NEW YORK, Merca- Nacionnan Uni a expresa diaranson su rechaso na cualkier tipo di violencia na Venezuela y a bisa di ta siguiendo e situacion di cerca. Esaki ta bin despues di un atake cu helicopter contra di e Tribunal Supremo di Husticia y e Ministerio di Interior, Husticia y Paz. “Obviamente nos ta opone cu firmesa na cualkier tipo di violencia na cualkier luga”, segun Stephane Dujarric, vocero di e secretario general di Nacionnan Uni, Antonio Gutierres. Dujarric a bisa cu ONU ta sigui e situacion na Venezuela, di cerca. Den e 3 lunanan di protesta, ya caba 77 persona a perde nan bida, segun fiscalia.
Segun autoridadnan, diamars un funcionario activo di e polis cientifico (Cicpc) a secuestra un helicopter di e unidad aki y bula ariba centro di Caracas pa tira contra di e Ministerio di Interior y Husticia, pa despues sigui pa e Tribunal Supremo di Husticia, caminda el a tira cuater granada, di cual tres a explota.
E supuesto responsabel, Oscar Perez, despues a pidi pa e renuncia di e presidente, Nicolas Maduro, por medio di un video.
Fuente: www.yosoyvenezolano.info