Sra. Ruthy Vrieswijk, conoci tambe como Lady Ruth, ta cla pa su di dos One Woman Show dia 26 di September riba peticion di publico.
E biaha aki, Lady Ruth ta bay celebra su di 33 aña den Scouting, pasobra manera su persona mes ta bisa, “Once a scout, always a scout”. Y escenario ta bay tin decoracionnan masha bunita diseña pa Chief Michael Tromp di Grupo San Dominico di Noord, mientras Jhon Freddy Montoya di Departamento di Cultura ta bay ehecut’e y hink’e den otro. Biaha pasa tabatin paraplunan bunita, e biaha aki ta bay tin bunitesa di naturalesa y scouting. Aña pasa a dedica e fondo recauda na Fundacion Hende Muhe den Dificultad. E aña aki lo dedica e fondo recauda na tres grupo di Scouting cu a sa di toca Lady Ruth su curason como lider, como verkenster, como ciudadano ehemplar.
Esakinan ta Grupo Santanero di Dakota, Grupo Kimbel O’Hara di Piedra Plat, y Grupo San Dominico di Noord. Nan tin bailadonan manera Alex Burkley y Irina Shabalina atrobe cu awo ta un pareha felizmente casa. Nan ta bin baila otro bunita tango na peticion di publico tambe. Nan tin Diana Antoinette celebrando 50 aña como dunado di lesnan di baile. Lady Ruth kier a pone un tiki luz riba su amiga sra. Antoinette y mustra e diferencia entre un profesional den baile cu ta domina e tecnicanan necesario y Lady Ruth mes cu ta inspira riba su propio forma di baile. E biaha aki Lady Ruth ta bay baila cu Stan Dabian. Biaha pasa el a baila cu Alex Burkley, pero awo Lady Ruth a invita sr. Dabian cu ta stima cultura pa nan baila. E trainingnan a cuminsa pa prepara e baile cu Lady Ruth y Stan Dabian lo presenta p’e publico. Un cos cu Lady Ruth no tin e biaha aki ta Tino Ruiz, kende su yiu a fayece tragicamente y no ta disponibel pa forma parti di e show. Pero el a duna permiso pa uza un piesa di dje. E ta toca mandolin riba cual Diana Antoinette ta bay baila.
Lady Ruth ta gradici Alex Bowen cu a diseña e poster chikito p’e evento. E ta un poster chikito, pasobra nan kier a mantene e gastonan mas abou posibel p’e fondo pa Scouting por ta mas grandi. E ta gradici Chipi Chipi tambe cu ta regala nan Life is just Dushi pa nan briya cu e logo ey. Palabra di gradicimento tambe ta bay pa Unoca cu a haya sala p’e show na Cas di Cultura y Cas di Culura mes cu ta dispuesto pa yuda cu tur e detayenan. Gruponan di scout y Van Dorp ta bendiendo e carchinan pa solamente 15 florin. Lady Ruth ta enfatisa cu alegria mester resalta.