E variante delta di coronavirus, identifica pa prome bes na India, y considera como “preocupante” door di Organisacion Mundial di Salud (OMS), ta cende alarma na Reino Uni unda e casonan ta den aumenta cada dia.
A pesar di a vacuna mita di e poblacion adulto cu e dos vacunanan, Reino Uni a registra 6048 caso nobo di contagio, casi dobel di e siman anterior ora cu a conta 3102 persona cu e virus aki. E variante Delta, ta esun cu mas ta domina na e pais, y autoridadnan ta calcula cu e ta wordo transmiti cu un 60% mas cu e variante Alfa, originario di Reino Uni. ,
“Siman prome nos tabatin prueba cu e variante di Delta tabatin un bentaha di transmision di entre 30 y 100% riba Alfa. Y esey a wordo confirma. Nos ta kere cu 60% probablemente ta e miho calculo,” segun Neil Ferguson, di Imperial College di Londen.
Aunke na Argentina ya a registra contagionan vincula cu e cepa aki, fuentenan oficial a afirma cu ainda no tin circulacion den comunidad di e paisnan.
OMS a afirma inicialmente cu tur variante ta “preocupante”. Sinembargo, siman pasa, nan a aclaria cu solamente un linahe mester wordo considera como asina, esun yama Delta, di acuerdo cu e categorisacion nobo cu letranan Griego pa evita stigmatisacion na e paisnan unda cu e mutacion a cuminsa.
Loke a pasa ta cu e variante B.1.617 –considera parcialmente responasbel di e brote di e pandemia na India-, a plama pa mas di 50 teritorio, cu tres diferente cepa. Pa awo, un so (B.1.617.2 o Delta) ta considera esun mas “preocupante” awo.
“Ta evidente cu actualmente e riesgonan di salud publico ta mas preocupante cu Delta, mientras cu a tuma nota di tasanan di transmision mas abao cu e otro cepanan,” OMS a bisa den nan comunicado.