Oficina principal di Arubus na Sabana Blanco ta cera awe diaranson 16 di September pa 12’or di merdia

Siguridad di nos empleadonan, clientenan y bishitantenan ta keda nos prioridad principal. Relaciona cu e ola extremo di contagionan local, Arubus NV tin e obligacion di informa comunidad di Aruba cu 2 di nos empleadonan den nos oficinanan na Sabana Blanco a test positivo pa COVID-19. Na momento cu e empleadonan aki a cuminsa desaroya sintoma di COVID-19, nan no a presenta na trabou mas y asina drenta un cuarentena preventivo pendiente nan resultado. Awor cu e resultado ta conoci, nos protocol interno pa cu COVID-19 mester keda intensifica, locual ta encera cu mester evacua e edificio y desinfecta esaki profundamente pa por reanuda servicio.

Pa loke ta transporte y nos chauffeurnan, nos ta keda mantene nos protocolnan existente di prevencion y desinfeccion na momento di haci uzo di nos servicionan. Nos ta sigura nos usuarionan cu nos servicio di transporte publico ta continua di manera regular, como cu nos ta mantene nos protocol di limpieza riguroso den nos busnan varios biaha pa dia. Nos chauffeurnan ta keda pendiente pa e usuarionan cumpli cu nos exigencianan di prevencion pa asina evita cu e virus di COVID-19 lo sigui plama.

Pa mas informacion tocante Arubus NV su protocol di siguridad y prevencion pa cu COVID-19, bishita nos website www.arubus.com

Aruba, hunto nos por baha e curva di COVID-19 door di mantene e reglanan existente di nos autoridadnan local di salud. Ban yuda otro door di yuda nos mes y ta mas consciente cu nos higiena y comportacion.

Comments

comments