Mirando e rol creciente di turismo y e branding nobo cu a keda lansa recientemente pa Corsou, ‘Feel It For Yourself’ esta ‘Sinti’e pa Bo Mes’, a yega e momento pa un website nobo. Oficina di Turismo di Corsou (CTB) a traha riba un website nobo cual awor a keda lansa. E website nobo ta consisti di colonan vibrante y imagennan espectacular di nos pais tanto den forma di potret como video cu sigur lo lanta curiosidad cerca tur potencial biahero pa nan bin experencia nos pais. CTB pa medio di e website nobo ta ofrece e biahero un plataforma facil cu ta yud’e crea un experencia memorabel tanto prome, durante como despues di su vacacion riba nos pais. Na mes momento e website nobo mester sirbi tambe pa brinda informacion na tanto stakeholders pafo como esunnan aki na Corsou.
Curacao.com ta un di e hermentnan importante cu ta forma parti di e mercado digital cu ta keda haci pa atrae mas bishitante pa nos pais. E website nobo ta tene cuenta cu e biahero di awendia ta busca recursonan cu por yud’e organisa y plania su biahe. Haciendo uzo di e curacao.com nobo e usuario tin e oportunidad pa por ehempel e mes crea un itinerario y pa asina despues e bishita y experencia diferente atraccion turistico riba nos pais. Otro componente cu tambe ta inclui den e website nobo ta experencianan autentico di esunnan cu ya a yega di bishita nos pais.
E website nobo ta na 6 idioma. Awor Frances a keda inclui na e idiomanan cu tabatin den e website anterior esta, Ingles, Hulandes, Spaño, Portugues y Aleman. Di e manera aki, CTB kier brinda bishitantenan den e mercadonan mas grandi tur informacion di Corsou den nan mes idioma. Invita specialmente bo conoshinan den exterior cu ainda no a bishita nos pais pa nan tambe bishita curacao.com y sa mas di nos dushi pais Corsou.