Oficina Central di Estadistica ta presenta e resultadonan principal di e Indice di Prijs di Consumo (CPI) pa luna di December 2020.
Indice di Prijs di Consumo pa luna di December 2020
E CPI pa luna di December 2020 ta 97.06, loke ta representa un subida di 0.1% compara cu e indice di November 2020 (96.93).
E cambio di e CPI pa e ultimo diesdos (12) lunanan (December 2019 te cu December 2020) ta -3.1%, un caida di 6.7 punto di porcentahe (ppt) compara cu e periodo corespondiente di aña pasa (3.6%).
E promedio anual di e tasa di inflacion pa e periodo di December 2019 te cu December 2020 ta -1.3%, un caida di 5.2 ppt compara cu e 3.9% registra den e periodo di December 2018 te cu December 2019.
Durante e luna aki, ocho (8) di e diesdos (12) sectornan a registra subida di prijs. E subidanan cu tawata tin e mayor efecto riba e CPI a wordo registra pa e sectornan di “Recreacion y cultura” (1.7%) y “Vivienda” (0.3%), causando un efecto di 0.17 y 0.07 ppt, respectivamente. E subidanan den e restante sectornan a contribui cu un efecto di 0.08 ppt riba e CPI di December 2020.
E subidanan aki a wordo contraresta parcialmente door di caida den e indice di e sectornan di “Transporte” (-1.1%) y “Cuminda y bebida no-alcoholico” (-0.4) cu a contribui cu un efecto di respectivamente -0.14 y -0.04 ppt riba e CPI di December 2020. E caida den e restante sector a contribui cu un efecto di -0.01 ppt riba e CPI di December 2020.
E subida den e sector di “Recreacion y cultura” a wordo causa door di principalmente un subida di 7.2% den e categoria “Vacacion”, causando un efecto di 0.21 ppt. E subida den e sector di “Vivienda” a wordo causa principalmente door di un subida den e categoria “Mantencion y reparacion di vivienda” (1.1%), causando un efecto di 0.06 ppt.
E caida den e sector di “Transporte” a wordo causa principalmente door di un caida den e categoria “Servicio di transporte” (-20.7%), causando un efecto di -0.10 ppt. E caida den e sector di “Cuminda y bebida no-alcoholico” a wordo causa principalmente door di un caida 0.4% den e categoria “Cuminda”, causando un efecto di -0.04 ppt.
Canasta di consumo
E canasta di consumo di e CPI ta consisti di 408 bienes y servicionan. Compara cu November 2020, 44.6% di e bienes y servicionan aki a conoce un aumento di prijs causando un efecto di 0.57 ppt, mientras cu 39.0% ta mustra un caida di prijs, cu a contribui cu un efecto di -0.43 ppt y pa e restante 16.4% no tawata tin cambio den prijs. Prijsnan di bienes a baha cu 0.01% y a causa un efecto di -0.01 ppt. Prijsnan di servicionan a conoce un subida di 0.3% y a causa un efecto di 0.14 ppt riba CPI di December 2020.
Core inflation
E CPIC (core inflation) – CPI excluyendo e efecto di energia y cuminda – a registra na December 2020 un subida di 0.1%. E indice di energia – cu ta consisti di e productonan: electricidad, awa, gasolin y diesel a registra un caida di -7.9%. E indice di cuminda a registra un caida di 0.8%.
Bestaansminimum
E bestaansminimum pa un hogar consistiendo di dos (2) adulto y dos (2) mucha (edad 0-15 aña) na December 2020 ta Afl. 4,757, un caida di Afl. 138 compara cu December 2019 (Afl. 4.895). E bestaansminimum pa un hogar di un (1) adulto ta Afl. 2,265, un caida di Afl. 66 compara cu December 2019 (Afl. 2.331).