E CPI pa luna di Januari 2024 ta 108.31, loke ta representa un caida di 0.4% compara cu e indice di December 2023 (108.79). E cambio di e CPI pa e ultimo diesdos (12) lunanan (Januari 2024 te cu Januari 2024) ta 1.5%, un caida di 5.1 punto di porcentahe (ppt) compara cu e periodo corespondiente di aña pasa (6.6%). E promedio anual (ultimo 24 luna) di e tasa di inflacion pa e periodonan di Januari 2021 te cu Januari 2022 y Januari 2023 te cu Januari 2024 ta 2.9%, un caida di 2.9 ppt compara cu e 5.8% registra den e periodonan di Januari 2020 te cu Januari 2021 y Januari 2022 te cu Januari 2023.
Durante e luna aki, cinco (5) di e diesdos (12) sectornan a registra caida di prijs. E caidanan cu tawata tin e mayor efecto riba e CPI a wordo registra pa e sectornan di “Transporte” (-2.2%), “Paña y sapato” (-8.8%) y “Recreacion y cultura” (-1.7%), causando un efecto di respectivamente, -0.27, -0.21 y -0.16 ppt. E caidanan den e restante sectornan a contribui cu un efecto di -0.10 ppt riba e CPI di Januari 2024.
E caidanan aki a wordo contraresta parcialmente door di principalmente un subida den e indice di e sector di “Cuminda y bebida no-alcoholico” (1.3%) cu a contribui cu un efecto di 0.15 ppt riba e CPI di Januari 2024. E subidanan den e sectornan restante a contribui cu un efecto di 0.15 ppt riba e CPI di Januari 2024.
E caida den e sector di “Transporte” a wordo causa principalmente door di un caida di 2.1% den e categoria “Gasto relaciona cu uso di vehiculo di transporte personal”, causando un efecto di -0.17 ppt. E caida den e sector di “Paña y sapato” a wordo causa principalmente door di un caida den e categoria “Paña” (-8.1%), causando un efecto di -0.15 ppt. E caida den e sector di “Recreacion y cultura” a wordo causa principalmente door di un caida di 6.9% den e categoria “Vacacion”, causando un efecto di -0.19 ppt. E subida den e sector di “Cuminda y bebida no-alcoholico” a wordo causa principalmente door di un subida den e categoria “Cuminda” (1.4%), causando un efecto di 0.14 ppt.
Canasta di consumo
E canasta di consumo di e CPI ta consisti di 408 bienes y servicionan. Compara cu December 2023, 44.9% di e bienes y servicionan aki a conoce un aumento di prijs causando un efecto di 0.74 ppt, mientras cu 37.0% ta mustra un caida di prijs, cu acontribui cu un efecto di -1.17 ppt y pa e restante 18.1% no tawatatin cambio den prijs. Prijsnan di bienes y servicionan a baha cada uno cu 0.4% y a causa un efecto di respectivamente, -0.25 y -0.18 ppt riba e CPI di Januari 2024.
Core inflation
E CPIC (core inflation) – CPI excluyendo e efecto di energia y cuminda – a registra na Januari 2024 un subida di 2.8%. E indice di energia – cu ta consisti di e productonan: electricidad, awa, gasolin y diesel – a registra un subida di 2.1%. E indice di cuminda a registra un subida di 5.5%.
Kico ta CPIC?
E CPIC (core inflation) of e inflacion basico ta un porcion di e inflacion unda cierto articulonan cu tin movimientonan di prijsnan volatil ta wordo exclui, manera productonan alimenticio y energetico. Na momento cu e inflacion basico wordo calcula, e componentenan mas volatil ta wordo elimina di e inflacion total. E indice di e inflacion basico ta sirbi pa evalua e tendencia riba medio y largo plazo di e nivel general di prijsnan. Pa ahusta maneho monetario, hopi economista ta enfoca riba e tasa di e inflacion basico, como cu esaki ta permiti un evaluacion mas profundo di e procesonan di inflacion reciente den e economia.
E CPIC ta wordo calcula door di compara e indice promedio di e periodo di e 12 lunanan mas reciente cu e promedio di e periodo di 12 lunanan anterior (Promedio anual).
Elaboracion di un CPI tin tres meta principal
1. Como un metodo di calculo pa compensa empleadonan pa motibo di perdida di poder di compra, ahustando nan salarionan, cu e proporcion di e cambio porcentual di CPI, locual ta conoci como indexering.
2. Como un mecanismo pa ahusta componentenan di e producto domestico bruto (GDP) di termino nominal pa termino real den cuentanan nacional. (Por ehempel door di elimina e efectonan di cambionan di prijs di e balor di consumo)
3. Como un medio pa gobiernonan y/of banconan central fiha obhetivonan inflacionario.
Bestaansminimum
E bestaansminimum pa un hogar consistiendo di dos (2) adulto y dos (2) mucha (edad 0-15 aña) na Januari 2024 ta Afl. 5,462, un subida di Afl. 2 compara cu December 2023 (Afl. 5,460). E bestaansminimum pa un hogar di un (1) adulto ta Afl. 2,601, un subida di Afl. 1 compara cu December 2023 (Afl. 2,600).
Kico ta un “Bestaansminimum” y con e ta wordo ahusta?
CBS ta defini un bestaansminimum como e nivel minimo di entrada cu ta wordo percibi necesario pa un persona of famia por funciona den sociedad di un manera adecuado y socialmente aceptabel. Ora nos usa e definicion “Bestaansminimum”, en realidad ta wordo referi na un “Sociaal Bestaansminimum” y no na e definicion literal di un “Bestaansminimum” cu ta referi na “e suma di placa necesario pa cumpra e bienes y servicionan cu ta wordo considera necesario pa biba un bida liber di privacionnan basico” (Nacionnan Uni). Un indice a wordo crea pa e “Bestaansminimum” door di calcula e costo di tur recursonan esencial cu un adulto promedio ta consumi durante un luna. Cada luna e indice aki ta wordo ahusta, a base di e prijsnan di alimento, paña, vivienda, transporte y otro articulonan den e canasta.
E bestaansminimum actual ta wordo basa riba e rapport
“Bestaansminimum 2010” publica door di CBS na Januari 2010, y cual ta wordo actualisa mensualmente segun e CPI. E unidad di referencia usa door di CBS (manera indica den e rapport aki) ta di un hogar cu ta consisti di dos adulto y dos mucha (di 0 pa 14 aña).
Bestaansminimum na Januari 2024
E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0- 15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).
Na Januari 2024 e bestaansminimum mensual pa un hogar cu ta consisti di dos (2) adulto y dos (2) mucha (edad 0-15 aña) (Afl. 5,462) ta mustra un subida di Afl. 99 compara cu Januari 2023 (Afl. 5,363) y a wordo causa principalmente door di subidanan di respectivamente, Afl. 65 y Afl. 29, den e sectornan di “Cuminda y
bebida no-alcoholico” y “Comunicacion”.
Na Januari 2024 e bestaansminimum mensual pa un hogar cu ta consisti di un solo adulto ta Afl. 2,601, cual ta representa un deficit di entrada di Afl 615, un caida di Afl. 46 compara cu e deficit observa un aña pasa (Afl. 661). E deficit aki ta e di dos mas halto registra den un periodo di seis (6) aña pa luna di Januari.
Cambio di prijs di petroleo, utilidad, gasolin y diesel na Januari 2024
Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na Januari 2024 e prijs promedio pa bari di petroleo (US$ 73.56) a conoce un subida di US$ 0.95 (1.3%) compara cu December 2023 (US$ 72.61). Prijs di electricidad y di awa no a cambia compara cu December 2023. Consecuentemente, e prijs promedio di electricidad pa vivienda a keda Afl. 274.57, mientras cu e prijs promedio di awa pa vivienda a keda Afl. 168.73.
Prijs di gasolin a registra un caida di Afl. 4.80 cent (-2.0%) na Januari 2024 y a causa un efecto di -0.09 ppt riba e CPI. Prijs di diesel a registra un caida di Afl. 13.60 cent (-6.0%) na Januari 2024 y a causa un efecto di -0.02 ppt riba e CPI. Na Januari 2024, utilidad, gasolin y diesel como grupo, tawata tin un caida di prijs di 0.7% compara cu December 2023 y hunto tawata tin un influencia di -0.11 ppt riba e CPI, mientras cu e restante 404 bienes y servicio hunto, a conoce un caida di prijs di 0.4% y tawata tin efecto un efecto di -0.32 ppt riba e CPI.
CPI pa e periodo Januari 2023 – Januari 2024
Indice di Prijs di Consumo
Den e ultimo diesdos (12) lunanan, e CPI a subi cu 1.5%, unda nuebe (9) di e diesdos (12) sectornan a registra subida di prijs. E subidanan cu tawata tin e mayor efecto riba e CPI a wordo registra pa e sectornan di “Comunicacion” (20.9%), “Cuminda y bebida no-alcoholico” (2.9%), “Restante bienes y servicio” (2.8%),
“Educacion” (24.8%), “Recreacion y cultura” (1.2%), “Restaurant y hotel” (2.2%) y “Salud” (5.3%) causando un efecto di respectivamente, 1.54, 0.34, 0.32, 0.24, 0.11, 0.11 y 0.11 ppt. E subidanan den e restante sectornan a contribui cu un efecto di 0.10 ppt riba e CPI di Januari 2023 – Januari 2024.
E subidanan aki a wordo contraresta parcialmente door di principalmente un caida den e indice di e sector di “Transporte” (-7.8%), cu a contribui cu un efecto di -1.06 ppt. E caidanan den e restante sectornan a contribui hunto cu un efecto di -0.29 ppt riba e CPI di Januari 2023 – Januari 2024. E subida den e sector di “Comunicacion” a wordo causa principalmente door di un subida di 21.1% den e categoria
“Servicio di telefon y fax”, causando un efecto di 1.49 ppt. E subida den e sector di “Cuminda y bebida no-alcoholico” a wordo causa principalmente door di un subida di 2.7% den e categoria “Cuminda”, causando un efecto di 0.28 ppt. E subida den e sector di “Restante bienes y servicio” a wordo causa principalmente
door di un subida den e categoria “Cuido personal” (5.1%), causando un efecto di 0.20 ppt. E subida den e sector di “Educacion” a wordo causa door di subida den e categorianan “Educacion secundario” (32.0%) y “Educacion preescolar y basico” (42.9%), causando un efecto di respectivamente, 0.14 y 0.10 ppt. E subida den e sector di “Recreacion y cultura” a wordo causa principalmente door di un subida di 4.9% den e categoria “Vacacion”, causando un efecto di 0.12 ppt. E subida den e sector di “Restaurant y hotel” a wordo causa door di subida den e categoria “Cuminda pafo di cas” (5.2%), causando un efecto di 0.24 ppt. E subida den e sector di “Salud” a wordo causa principalmente door di un subida di 6.3% den e categoria “Producto, aparatonan y ekipo medico”, causando un efecto di 0.08 ppt.
E caida den e sector di “Transporte” a wordo causa principalmente door di un caida di 18.2% den e categoria “Compra di vehiculo”, causando un efecto di -0.91 ppt.
Canasta di consumo
Den e ultimo aña cu a pasa 57.8% di productonan den e canasta di consumo di e CPI a conoce un aumento di prijs causando un efecto di 4.76 ppt, mientras cu 35.0% ta mustra un caida di prijs, cu a contribui cu un efecto di -3.24 ppt y pa e restante 7.1% no tawata tin cambio den prijs. E indice di “Bienes” (-1.4%) a registra
caida, causando un efecto di -0.82 ppt, mientras cu e indice di “Servicionan” a registra un subida di 5.8% y a causa un efecto di 2.34 ppt.
Bestaansminimum
Den e ultimo diesdos (12) lunanan e bestaansminimum pa un hogar consistiendo di dos (2) adulto y dos (2) mucha (edad 0-15 aña) a registra un subida di Afl. 99, di Afl. 5,363 na Januari 2023 pa Afl. 5,462 na Januari 2024. E subida aki a wordo causa principalmente door di subida den e sectornan di “Cuminda y bebida no-alcoholico” (Afl. 65) y “Comunicacion” (Afl. 29).
Cambio di prijs di petroleo, utilidad, gasolin y diesel
E prijs promedio pa bari di petroleo a conoce un caida di US$ 4.45 (-5.7%) di US$ 78.01 na Januari 2023 pa US$ 73.56 na Januari 2024. E indice di Energia a baha cu 4.7% den e ultimo aña y a causa un efecto di -0.83 ppt. E indicenan di “Gasolin” (-4.5%) y “Diesel” (-13.4%) a registra caidanan, causando un efecto di respectivamente -0.21 y -0.05 ppt riba e CPI. E indice di “Electricidad” (-6.8%) a registra caida, causando un efecto di -0.57 ppt, mientras cu e indice di “Awa” no a registra cambio. E restante 404 bienes y servicio hunto, a conoce un subida di 2.9% y tawata tin hunto un efecto di 2.35 ppt.
Cambio di prijs di Cuminda y servicio di catering
Den e ultimo diesdos (12) lunanan e indice di “Cuminda & servicio di catering” a subi cu 3.6%. E indice di “Cuminda na cas” a conoce un subida di 2.9%, unda shete (7) di e diesun (11) indicenan di e gruponan di “Cuminda na cas” a subi durante e periodo aki. E indice di “Sucu, jam y otro tipo di cos dushi” a conoce un subida di 13.2%, e subida mas grandi entre e gruponan di “Cuminda na cas”. Ademas otro subidanan significante a wordo registra den e indicenan di “Restante productonan pa alimentacion” (9.9%), “Fruta” (5.9%), “Lechi, keshi y webo” (5.5%) y “Batata, yuca y batata dushi” (4.8%). E caida mas grandi durante e periodo aki a wordo registra den e indice di “Carni” (-2.5%). E indice di “Cuminda pafo di cas” a registra un subida di 5.2% den e ultimo diesdos (12) lunanan.
