Diabierna dia 2 di November, Parke Lisette, na Parkietenbos a keda inaugura pa Directeur nobo di Serlimar Sui Generis. Un parke completamente nobo cu e meta principal pa haci un cambio na e entrada di Parkietenbos pa laga esaki mustra mas alegre y pa brinda nos comunidad un otro experiencia na e sitio. Parke Lisette ta habri pa publico tur dia di 7pm te cu 9pm di anochi.
E idea pa bin cu un parke a wordo planifica y ehecuta door di empleadonan di Parkietenbos, pa cual nan a cuminsa den luna di augustus di e aña aki. E idea di un parke simpel a crese y bira un proyecto sumamente special caminda tur mata y material cu bo por mira den e parke a wordo escogi of traha na man cu material reciclabel. E Piedra nan ta di Sero Tijshi, e mata nan ta di nos mondinan di Aruba, e santo ta di nos playa nan, e boto a wordo completamente recicla, e stoel, mesa y brug tur a wordo wordo traha di palonan recicla cu inicialmente a wordo tira afo na Parkietenbos.
Pa e temporada dushi di fin dia aña empleadonan di Parkietenbos a decora e parke completo cu luznan di pasco pa asina ilumina e parke y tambe trese e ambiente di fin di aña mas serca na Parkietenbos. E bunita ta cu e luznan cu ta ilumina e parke completo, mayoria a wordo ta donacion di nos comunidad humilde. Serlimar S G ta sumamente orguyoso di Parke Lisette y e echo ta cu e proyecto aki ta carga y ta ilustra nos meta principal pa; reduci cantidad di desperdicio cu ta bai ariba Parkietenbos, re-uza mas material re-uzabel y tambe recicila mas material cu por wordo recicla.
Pa haci esaki mas special, lo bai tin un box special pa recuada fondo, caminda pueblo di Aruba por haci un donacion ora di bishita e parke. E fondo recauda lo wordo entrega den na otro fundacion pa yuda esnan den nececidad.
Serlimar kier a duna danki na tur esnan cu a yuda y aporta na e idea aki y cu a haci esaki un realidad cu por a inaugura nos Parke Lisette oficial pa publico, pa asina nan por bin y disfruta di e ambiente di fin di aña. Un danki special ta bai pa Lisette Wever, Rene Rasmijn, Georxinia croes y tur e otro empleadonan di Parkietenbos cu a traha duro pa haci e parke un realidad.