Diadomingo awor 5 di november, Aruba Triathlon Association lo tene penultimo actividad di e temporada 2017, unda lo organisa e Off Road Triathlon esaki 7or di mainta na Arashi Beach. E OFF Road Triatlon Nacional lo bira e penultimo actividad pa e aña aki. Por competi den e categorianan di mucha, junior y adulto mientras por a bay den ekipo di relevo. Lo por competi riba dos distancia esta un “Full distance” unda lo ta landa 700 meter, bicicleta 14 km y core na pia 4.4 km, e asina yama “Half distance” unda lo ta landa 350 meter, bicicleta 7 km y core na pia 2.2 km.
Den e categoria Full distance por competi Men 15-19 Men 20-29 Men 30-39 Men 40-49 Female open Men 50+ y Relay open. Mientras den e categoria Half Distance por competi Kids Male / Female under 10 Kids Male / Female 10-11 Kids Male / Female 12-14 Relay Kids open Male open y Female open. E deporte di triathlon mundialmente ta ser considera un di esnan mas dificil pa praktica. E tres disciplinanan den un solo evento no ta nada facil, e landamento riba cierto distancia den awa ya caba ta trece su esfuerso cune, e recorido riba bicicleta cu ta sigui despues semper ta esun di mas largo y por ultimo coremento na pia riba un distancia di algun kilometer ta esun cu ta pisa mas sigur si e condicion di tempo ta uno pisa, sea ta den solo, frieu, ect. Den e ultimo añanan, Aruba Triathlon Association a encurasha varios atleta pa practica e deporte aki y sigur esaki tabata tin su efecto unda mas y mas hende a tuma e reto di nan mes.
Un danki sigur na Lotto, e Loteria di Aruba cu pa medio di Comision di Subsidio a subsidia e competencia di Off Road Triathlon.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
Inscripcion:
Miembro Individual AWG. 10,–
NO Miembro Individual AWG. 20,–
Relay Team AWG. 30,–
Por inscribi via website: www.arubatriathlon.com
Pago di inscripcion lo sosode e mainta prome cu e evento.
Ultimo dia pa inscribi lo ta 2 di november 2017
A.T.A. ta spera e tri-atletanan lo ta presente na tempo, pa e evento start na ora.
Lo tin medaya pa e categorianan y trofeo pa campeonnan femenino, masculino y mucha.