NEW YORK, Merca- Despues di un dia largo, cu 19 voto na fabor, cuatro contra y 11 abstencion, OEA a aproba e resolucion pa cu Venezuela.
E documento ta pidi e desconocimento di e eleccionnan presidencial realisa dia 20 di mei ultimo, unda cu Nicolas Maduro a resulta reeligi segun cifranan otorga pa e Conseho Nacional Electoral (CNE), como tambe e apertura di un canal humanitario y reconocimento di e parlamento Venezolano.
Despues di un sesion largo, unda cu mester a spera un hora y mei pa e presentacion di e resolucion riba Venezuela, 19 pais di OEA a desconoce e resultado di eleccion di Nicolas Maduro. Nan a urgi pa colaboracion den recuperacion di democracia y e apertura di un canal humanitario pa e Venezolanonan.
Prome cu e votacion, e representantenan di Antigua y Barbuda y di Bolivia, a retira nan proposicion di un coreccion di e resolucion ya cu nan ta considera cu esakinan lo no haya oido. Nan a urgi pa traha hunto pa un solucion politico di e problemanan di Venezuela.
despues di e aprobacion e canciyer di Venezuela, Jorge Arreaza a califica e resolucion como “n fraude di forma y fondo”. El a sigura cu e “aprobacion aki teoreticamente ta duna Merca ‘carte blanche’ pa sigui ataca y interveni na Venezuela”.
E aprobacion di e resolucion ta implica cu lo por convoca un reunion extraordinario pa trata e suspension di Venezuela for di e organismo. Pa esaki, 24 estado lo mester duna su aprobacion.
Den oranan di mainta, e representantenan di varios pais a debati riba e sancionnan di Merca contra Venezuela, unda cu Trujillo a resalta cu ta medidanan specifico “contra personanan specifico”. Asina tambe e ta desmenti e declaracionnan di e canciyer Venezolano, Jorge Arreaza, cu ta afirma cu e sancionnan ta contra di e pueblo Venezolano”.
“E colapso economico di Venezuela ta den man di Maduro”, Trujillo a bisa.