BOGOTA, Colombia- E tire di su rolstoel ya caba ta sacando e weanan. Pero Jose Agustin Lopez ta carga speransa di cu e tire lo wanta e 500 km cu falta pa yega Bogota pa ricibi asistencia medico cu e no ta haya na Venezuela.
Su yiu, Jefferson Alexis ta pusha e tata ora cu nan ta subiendo e seronan di Colombia y nan ta sostene ora cu nan ta bay ta bahando. E friu y calor extremo, cu ta cambia e paisahe di e geografica,. nan dos ta compañeronan inseparabel.
“Mi a hayami obliga di sali rumbo pa Colombia pa haya tur e remediann cu mi mester y algo di cuminda pa hiba cas”, Jose Agustin, di 52 aña ta conta na AFP.
Tres aña pasa el a perde gevoel den ambos pia den un accidente di trafico. Su trabao como mensahero a keda den pasado y e bida di San Cristobal, den e area di west di Venezuela a cuminsa bira di pio segun cu e pais petrolero tabata cayendo den un profundo crisis economico.
El a mantene su mama, su casa y su tres yiunan cu rifa cu e tabata bende na bisiña y desconocinan. E demas miembronan di e famia tambe tabata aporta manera nan tabata por. Pero “aworaki ayanan no por rifa nada, no tin yudansa di nada, niun hende ta yuda cu nada”, el a bisa.
Pa colmo, despues di tanto tempo sinta den un rolstoel a provoca cu el a haya abces na su anus. Dokternan a haci un colostomia cun’e, pa “e no contamina cu su propio sushi, pero na su pais e no tabata haya ni e antibioticonan ni e material pa cubri e herida cu ta habri”.
“Si mi a keda ayanan mi ta kere cu “mi tabata morto, mi lo a contamina”, e ta conta casi na yoramento. Awo e tin cu tapa e herida cu saconan di plastico di supermarket y tape industrial. Y band’i caminda.
P’esey, como miles di Venezolano, tata y yiu a dicidi di crusa frontera cu Colombia. Nan a sali siman pasa diaranson for di e capital di estado Tachira sin placa pa paga bus pa bay Bogota como destino.
Den tres dia nan a recore un trayecto cu otro migrantenan a tarda algun hora na pia of un den bus, si nan tin suerte.
Tata y yiu, hunto a pasa varios anochi riba camindanan scur, cu miedo di un asalto of di wordo mordi pa algun colebra, cu ta scondi den e matanan. E dekennan y corchon a muha door di e awaseronan nocturno.
“E ta un demostracion di amor”, Jose Augustin a bisa di su yiu, Jefferson di 26 aña, cu a laga su estudio di ingenieria pa compaña su tata den e odisea aki.
Habitantenan di e pueblonan ta duna na cuminda, incluso deken. Nan ta come banda di caminda, a pesar di e risico di wordo gedal pa truck, brommer of autonan.
“Si mi yega Pamplona ta un milager di Dios”, un Jose Agustin, tur angustia, ta reconoce.
E “milager ” a wordo cumpli. Dos dia despues di a wordo entrevista riba e caminda pa Pamplona, Jose Agustin a comunica cu AFP, bisando cu un ambulance a rescata nan.