KRALENDIJK – Dia 20 di maart 2019, votadonan na Boneiro lo por kies entre ocho partido pa eleccionnan di eilandsraad. Ta trata di seis partido politico y dos lista.
Ariba e lista no ta aparece un nomber full ariba. Esaki ta e caso si cu e seis partidonan politico. Presidente di e Conseho Electoral di Boneiro, Sr. Edison Rijna, a informa di esaki for di Passangraham.
PARTIDONAN
E partidonan cu lo participa na eleccion ta: Lista Rafael Santana, Era Nobo, Frente Sosial Progresivo (FSP), Demokrat, 1Union pa Pueblo, Union Partriotiko Boneriano (UPB), Movementu di Pueblo Boneriano (MPB), Lista Suzy Thode.
Den e ultimo eleccion, cuatro aña pasa, un total di shete partido a participa. E tempo ey tabata tin cuater partido nobo entre cual Movementu di Pueblo Boneriano (MPB) di Elvis Tjin Asjoe cu como partido di mas nobo a haya e mandato di e pueblo.
NUMERACION
Pa medio di tiramento di lot, cada lista a haya nan numeracion. Era Nobo ta lista number 4, Lista Rafael Santana 5, FSP 6, 1Union pa Pueblo 7 y Lista Suzy Thode 8.
Den e eleccionnan di 2015 MPB cu’n total di 2755 voto, ta saca mayoria. P’esey MPB ta figura como lista nr. 1 e biaha aki, Demokrat lista nr. 2 y UPB ta di tres ariba e stembiljet.
DOS BIAHA
E aña aki, pa prome biaha, ademas di e eleccionnan di eilandsraad, lo por vota tambe pa kiescollege Bonaire. E kiescollege ta e organo di representantenan di pueblo, cu hunto cu e miembronan di Provinciale Staten, mag di vota pa miembronan di Eerste Kamer. Un total di 54 candidato a ponenan mes reeligibel.