Fundacion Parke Nacional Aruba a yama un conferencia di prensa, unda a hiba palabra Norman Kuiperi, unda el a bisa cu tabata necesario pa aclaria e asunto di sentencia di Corte den caso di FPNA contra Aruba Ocean Villas y pais Aruba.
Un di e motibonan pa e caso aki ta cu Ocean Villas tabata actuando di forma illegal y destruyendo naturalesa. E proyecto aki ta na Savaneta, unda ta construyendo cabana. El a splica cu a sinta varios biaha na mesa, pero no a logra yega na un acuerdo cu e propietario. A dicidi pa mitiga e daño na e mangrovenan y otro parti di naturalesa.
Escenci di e decision di Corte, Kuiperi a splica, ta cu a bis Ocean Villas cla y raspa cu nan no por sigui haci mas daño na naturalesa. Nan no por sigui cu construccion tanten cu no tin e permiso necesario, aanleg vergunning. “Cu esey, e ta bisa hopi.”
A bisa cu no por destrui naturalesa bou di ningun circunstancia. Pa cada bes cu e viola e decision aki, door di construi, e ta haya un boet di 10 mil florin pa dia. Bienestar di Aruba y balor di naturalesa ta importante, pa cual cualkier desaroyador mester tene cuenta cu esaki.
Mirando e importancia di naturalesa, den turismo, FPNA a dicidi di laga un compania internacional haci un quick scan pa kico ta wordo haci den lama y den e mangrovenan banda di e proyecto. E rapport a wordo entrega na Corte y ta similar na un MER-Rapport. Esun di Aruba Ocean Villas tin varios omision. Por ehempel, con ta limita e sonido di luz pa no afecta bida marino; unda awa sushi ta bay (kico ta uza pa deshaci di awa di baño); ki plan tin si un of mas tubo di e cabananan, riba lama, kibra. Ki tipo di insecticida ta uza pa sangura y con dañino e ta pa mangrove y lama.
Kuiperi a splica cu e permiso di aanleg vergunning ta den man di DOW, DIP y pais Aruba pa dun’e of no. E ta bini despues di haya bouwvergunning.