Dia 30 di September 2020, directiva nobo di SVOA cu ta dirigi Colegio Arubano a reuni tocante statutonan nobo pa e fundacion. Akinan segun OCCA ta para cu ta remarcabel con den e statutonan nobo aki – cual ora nan keda aproba por medio di obispo di Willemstad – mayor no tin un representacion mas den directiva.
Tamara Croes, presidente di OCCA, e comision di mayor di Colegio Arubano a habri siman cu un rueda di prensa pa asina pone mas presion riba nan peticion pa mantene representante den SVOA. Sra. Croes ta haya cu ta un lastima cu atrobe nan mester lucha cu Colegio Arubano cu un otro directiva.
OCCA ta informa cu SVOA a saca nan afo di nan directiva y awor mayornan ta sin bista of bos, entre otro riba con e placa di scol ta ser gasta.
https://www.facebook.com/masnoticia/videos/362986868159133
Sra. Croes ta bisa cu desde 2005 mayornan ta sinta den directiva di SVOA, y pa 15 aña largo nan ta e bos pa Colegio Arubano. “E plan awor pa aña escolar 2020 ta pa kita nos bos”, sra. Croes ta expresa. Nan no ta compronde pa kico nan bos ta wordo kita den loke ta participacion den decisionnan importante cu ta concerni educacion di nan yiunan.
OCCA kier pa mayornan lanta, uza nan bos y bay firma e peticion pa mustra obispado cu nan kier tin representante den directiva den SVOA. E link pa mayornan firma e peticion pa mantene OCCA den directiva di SVOA ta akinan ta obtenibel riba Oudercommissie Colegio Arubano – OCCA – “Conseho di Mayor” Facebook Page.