WASHINGTON D.C., Merca – Presidente Barack Obama, lo revisa su strategia militar contra e grupo Estado Islamico, lo presiona e paisnan pa nan admiti mas refugiado y analisa e progreso den mundo henter, apesar di desafionan nobo, durante su ultimo participacion den e sesion di e Asamblea General di ONU cu lo wordo realisa otro siman na New York, Cas Blanco a informa diabierna.
Den e marco di e sesion ey, Obama tin reunionnan programa cu lidernan di Colombia, Irak y tin planea pa promove comercio entre Merca y Africa.
Obama lo biaha diadomingo pa New York pa participa den su di ocho y ultimo sesion como presidente di e Asamblea General, cu lo cuminsa dialuna.
Diaranson, Obama lo bay tin un encuentro cu e presidente di Colombia, Juan Manuel Santos, cu e obhetivo di discuti principalmente e reciente acuerdo entre e gobierno Colombiano y e Forsanan Arma Revolucionario di Colombia (FARC) pa pone fin na 52 aña di hostilidad, loke ta representa e conflicto arma mas largo den e hemisferio occidental.
Merca a respalda e acuerdo y e pueblo Colombiano lo bay vota al respecto durante un referendum nacional cu lo tuma luga na comienso di October.
Cas Blanco a señala cu Obama y e prome minister Iraki, Haider al-Abadi, tin planea dialuna pa discuti e progreso di Irak contra di e grupo Estado Islamico y un operacion planea pa e ehercito di Irak pa libera e ciudad di Mosul, cual a wordo tuma pa e agrupacion extremista.
Diamars, Obama lo bay tin un encuentro cu e presidente di Nigeria, Muhammadu Buhari, pa papia di e respaldo di Merca pa e siguridad y cambionan economico y esfuerso di e Gobierno contra di e grupo extremista Islamico Boko Haram.
E mesun dia ey, durante un cumbre di refugiadonan acogi pa e presidente, ta di spera cu Obama pone mas presion riba mas nacion pa nan habri nan fronteranan y yuda duplica e cantida di refugiadonan cu ta wordo reubica rond mundo. Mexico, Suecia, Canada, Alemania, Jordania y Etiopia, tambe lo organisa e sesion di manera conhunto cu e secretario general di ONU, Ban Ki-moon.
Europa a carga cu gran parti di e crisis di refugiadonan Sirio. Canada a ricibi 25 mil refugiado Sirio y Merca recientemente a alcnasa e meta di ricibi 10 mil refugiado Sirio e aña aki.
Fuente: http://www.elcaribe.com.do/