E reunion cu gerencia di MFA a tene cu Bos di Paradera diamars ultimo a bay den bon ambiente. “E tabata hopi ameno; mayoria miembro tabata t’ey y tabata hopi interesante con Sr. Elton Hart a splica kico tur ta haciendo y proyectando pa haci,” asina Nyree Hart a duna di conoce.
E encuentro ta forma parti di trabou cu gerencia di e facilidad multifuncional y e klankbordgroep di e bario pa traha hunto. “Asina nos tambe ta incorpora y yuda den cierto cosnan anto duna nos ‘bijdrage’ pa e bario di Paradera.”
Loke mas a hala atencion di Hart durante e presentacion, ta e idea y plannan cu tin pa esnan mas chikito den comunidad. Como juffrouw di kleuterschool Hart ta ansioso pa participa den e organisacion; no solamente den MFA, pero tambe den Caiquetio. E ta wak esaki como un reto hopi interesante.
Hart ta invita un y tur pa sigui e desaroyonan di MFA Paradera di cerca pa medio di nan pagina di Facebook. Like y bishita MFA Paradera Aruba. “Como miembro di Bos di Paradera mi tambe lo share loke MFA Paradera pone y asina pa e yega na tur hende di Paradera en particular, pero tambe tur otro hende di Aruba,” asina Hart a finalisa bisando.
