TUNEZ, Tunisia- Un terorista suicida a rementa su mes dialuna den e centro di Tunez, cerca di un unidad di polis, segun fuentenan policial. E ekiponan di emergencia a yega rapidamente na e Avenida Habib Bourguiba, unda a explosion a tuma luga, den pleno curason di Tunez. E balans oficial di victimanan ta di ocho polis herida y un ciudadano. E unico victima fatal di e explosion ta e atacante suicida, un muhe di 30 aña, segun e Ministerio di Interior.
Despues di e Revolucion di 2011, e accionnan terorista di parti di gruponan extremista Islamico a multiplica. E blanco principal di e atakenan tabata e forsanan di siguridad, cu a perde mas di un centenar di nan miembronan. Sin embargo, na 2015, ISIS a comete dos atentado sangriento contra di interesnan turistico cu a laga mas di 50 bishitante stranhero morto.
Desde e tempo ey, autoridadnan a logra desarticula varios celnan terorista, y otro gruponan ta hopi debil. Desde e atakenan aki e pais ta biba bou di un estado di emergencia, cual ta duna podernan special na e forsanan di siguridad.