BOGOTA, Colombia – Un autobomb a explota dilanti di e Escuela de Policía General Santander, lagando nuebe persona morto y mas di 50 otro herida. Entre e personanan cu a perde nan bida ta haya e cadete Ecuatoriano Erika Sophia Chico Vallejo. Mientras cu’n otro cadete Ecuatoriano, Carolina Sanango Molina, a resulta herida. Den e academia tabata tin 10 studiante Ecuatoriano. Un ciudadano Panameño tambe a resulta herida.
E auto a explota den e scol, ubica den e zona sur di Bogota, unda cu aspirantnan di polis ta sigui nan estudio. Na momento di e explosion tabata tin un ceremonia tumando luga.
Autoridadnan ta investigando e causa y no ta descarta un atentado terorista. Despues di e explosion a reina den e luga di e incidente pafo di e academia di polis, cu ambulance y helicopter yegando na e luga cu normalmente ta bou control estricto.
Testigonan a bisa cu nan a scucha un explosion duro cu a destrui e bentananan di e edificionan den cercania. Potretnan cu ta circula ariba rednan social ta mustra e vehiculo kima y rondona di e ruina riba e campus di e academia.
Rebeldenan di movimento iskierdista ‘Ehercito di Liberacion Nacional’ a intensifica nan atake conta polisnan di Colombia, despues di cu nan no a yega na un acuerdo cu e presidente conservador Ivan Duque riba reanudacion di e dialogo di paz, pa cual ta pensa cu e explosion por a wordo perpetra door di ELN, mirando cu e ta nan modus operandi.
Fiscal General di e pais, Nestor Martínez, a bisa cu ta analisando e escena di e crimen en busca di pruebanan cu por conduci na e responsabelnan.
Presidente di Colombia, Ivan Duque, a cancela e conseho di siguridad cu e tabata tin planea na Quibdo y segun Caracol Radio, e ta sigui e situacion di cerca for di e avion presidencial. “Colombia completo ta rechasa terorismo y nos ta uni pa enfrenta esaki. Colombia ta tristo, pero e no ta doblega pa violencia”, Duque a agrega. Presidentenan di Panama, Juan Carlos Varela, y Ecuador, Lenín Moreno, a solidarisa nan mes cu e victimanan.
Durante decadanan, habitantenan di Bogota a biba cu e miedo di bira victimanan di atake cu bomb door di e rebeldenan izkierdista of di e Cartel de Medellín di Pablo Escobar. Sin embargo, ora cu e conflicto na Colombia a trankilisa, e siguridad a bira mas y e atakenan ta menos frecuente.