Diadomingo autoridadnan a anuncia c unan a haya cuatro curpa entre e ruinanan di e condominium Champlain Towers South. Esaki ta haci e total di fayecidonan nuebe, mientras cu 152 ta desapareci desde cu e edificio di Surfside a collapse diahuebs marduga.
Ademas, a informa cu a haya “restonan humano” den e monton di e ruina cu a keda despues cu parti di e edificio di 12 piso a collapse parcialmente, y ta calcula cu e saldo di morto lo sigui aumenta.
Autoridadnan concerni di Miami-Dasde a identifica mayoría di e nuebe fayecidonan haciendo uzo di material di DNA. Pero a haci apelación si cualkier persona tin un familiar desapareci, pa tuma contacto cu e funcionarionan debi cu no a logra haya contacto cu tur persona.
E cifra di personanan desaparecido ta 152, cu ta tur e habitantenan no localisa desde diahuebs y cu familiarnan a raporta como desapareci.
Autoridadnan ainda no a splica e causa di e catastrofe aki, cu por bira un di esnan mas mortal den historia di Merca. E investigacion por tarda simannan of lunanan. A contracto un famoso ingeniero di structura, Allyn Kilsheimer, fundador y director ehecutivo di KCE Structural Engineers.
Sinembargo, varios experto den ingeniería cu a revisa e evidencianan disponibel a bisa cu probablemente e fayo a cuminsa na e terasa di e piscina.
Diadomingo a logra sigui cu e trabou di buskeda despues cu e Bomberonan a logra controla un candela abou cu a tuma mayoria di nan tempo diasabra.
Tin rond di 300 experto trahando na e sitio den turnonan di 12 ora sin stop.
Tras di e edificio cu a collapse tin yen di historia. Tin famia di presidente di Paraguay. Un mucha muhe a yega diaranson anochi di e pais ey pa traha cu nan, den su prome biahe pafo di su pais. Den un otro caso, un yiu muhe a yega di New York, diaranson tambe, pa bishita su mayornan. Un pareha gay a bini di Argentina pa huy di Covid y vacuna nan yiu muhe chikito. Nan tur ta desapareci.