Boneiro: Notisia di polis di djabièrnè 24 di te ku djárason 29 di mei 2019
Riba djabièrnè 24 di mei, alrededor di 9.40 or un aksidente a tuma lugá entre un outo di servisio di KPCN i un skuter, riba Bulevar J.A. Abraham. Shofùr di e skuter a keda herida na su brasa i mas la a resultá ku su brasa a sali for di lugá. Ambulans a transporte pa hospital pa tratamentu médiko.
Riba djaluna 27 di mei pa mas o ménos 1 or di mardugá un aksidente a tuma lugá riba Kaya Korona. Ambulans a transportá shofùr di e outo pa hospital pa tratamentu médiko. Dor ku e outo tabata saka huma i zeta a basha riba kaminda a pidi asistensia di brantwer. A notifiká WEB tambe komo ku e outo a dal den un pal’i lus i parti di e lus tabata kologá los.
Riba djaluna 27 di mei a drenta keho di kiebro den un kas na Sabadeco Shores. Entre 7.45 or di anochi i 10 or di anochi, deskonosínan a bai ku un seif ku den dje entre otro algun pasport i un lèptòp di marka HP. E sospechosonan a drenta e kas dor di a kibra un bentana di palu den e sala.
Riba djamars 28 di mei a drenta keho di kiebro den un negoshi situá na Kaya L.D. Gerharts, for di aki deskonosínan a bai ku algun paña.
Riba djamars 28 di mei pa mas o ménos 11 or di mainta a tene un kontrol di tráfiko riba Kaya Internashonal. A kontrolá un total di 40 vehíkulo I a duna algun but pa korementu sin reibeweis i pa papelnan di seguro no bálido. Delaster tempu ta kontrolnan di tráfiko ta keda tene regularmente. E kontrolnan aki ta keda hasi dor di e aspirantenan komo tarea di èksamen.