Kralendijk Boneiro:Aki ta sigui e noticianan policial di Boneiro. Notisianan di polis di djaluna 12 di yüni te ku djárason 14 di yüni 2017.
Riba djaluna 12 di yüni a drenta keho di kiebro den un kas situá na Kaya Dr. J.G. Hernandez. A bai ku entre otro un lèptòp kolo pretu di marka Asus, un lèptòp kolo shinishi di marka HP, un oloshi kolo oro/plata di marka Anne Klein, algun joya, un tas di lomba, un telefòn selular bieu di marka Samsung, un tas di makiahe di marka MAC i un kargadó kolo di plata. E kiebro a tuma lugá entre 7 or i 11.45 or di mainta. A drenta keho tambe di un kiebro den un pakus situá na Sorobon. For di aki a bai ku diferente paña. E kiebro a tuma lugá entre djadumingu 11 di yüni, pa mas o ménos 6.15 or di atardi i djaluna 12 di yüni, pa mas o ménos 6.30 or di mainta. Mas lat riba e mesun dia un aksidente ku un skuter a tuma lugá riba Bulevar E.E.G. Dos turista a dal den asera dor di falta di eksperensia i a kai. Ámbos víktima tabatin raskunan na nan kurpa i e pasahero tabatin un wesu di wea di funchi kibra. Ambulans a transportá ámbos víktima pa hospital pa tratamentu médiko. Pa mas o ménos 10 or di anochi sentral di polis a risibí notifikashon di un atrako arma riba un kas situá na Kaya Chroom. Dos hòmber ku kara tapa, full na pretu i armá ku arma di kandela, tabata eksigí cannabis i sèn for di e habitantenan. E hòmber di kas ta haña cannabis riba reseta di su dòkter pa motibunan médiko. Nan a bai ku un pòtmòni.
Riba djamars 13 di yüni, entre 9.45 or i 10.45 or di mainta, a bai ku kuater tapa di wil for di un outo di marka Toyota Yaris ku tabata stashoná riba un sitio di stashoná situá na Kaya Soeur Bartola. Tambe dos aksidente a tuma lugá; un entre un outo di famia i un ‘loader’ riba Kaya Dr. J.G. Hernandez, alrededor di 7.45 or di mainta i un entre dos outo riba Kaya G.F. Croes, alrededor di 11 or di mainta. Den ámbos kaso ambulans a bin na e sitio i sea a hiba víktimanan hospital pa tratamentu médiko òf a trata víktima (nan) na e sitio mes. Mas lat riba e mesun dia a drenta keho di kiebro den un akomodashon turístiko situá na Bulevar E.E.G. for di kaminda a bai ku entre otro un iPad kolo di plata di marka Apple, un iReader di marka Amazon, un telefòn selular kolo pretu i sèn kèsh. E kiebro a tuma lugá entre 6.30 or i 9.15 or di anochi.
Riba djárason 14 di yüni a drenta keho di kiebro den un kas situá na Kaya Alemania. A bai ku entre otro un telefòn selular di marka Blue i un pòtmòni ku sèn kèsh.