Notisia di polis di djaluna 5 di ougùstùs te ku djárason 7 di ougùstùs 2024
Detenshonnan pa manehá bou di influensia
Riba djárason 7 di ougùstùs, alrededor di 3.05 or di mardugá, a detené un dama di inisial M.K.M.v.d.V. di 18 aña di edat riba Kaya Korona pa manehá bou di influensia di alkohòl. A detené e dama despues ku e tabata mustra un komportashon di manehá remarkabel. Durante di e kontrol por a konstatá ku e sospechoso tabata mustra diferente karakterístika di un persona ku ta bou di influensia di alkohòl. A hasi un tèst di supla kuné for di kua a resultá ku el a konsumí mas alkohòl ku ta permití. A detené i hib’é warda di polis pa un análisis di rosea. A konsekuensia di e resultado di esaki a konfiská su reibeweis.
Riba djamars 6 di ougùstùs, alrededor di 3.30 or di mardugá, a detené un hòmber di inisial L.P.A. di 33 aña di edat riba Kaya Industria pa manehá bou di influensia di alkohòl. Un patruya ku tabata kore riba e kaya menshoná a mira dos hòmber ku probablemente tabata den diskushon ku otro. Un di e hòmbernan tabata kana banda di e vehíkulo ku tabata kore. Na momentu ku e patruya a bira bèk pa aserká e hòmbernan, nan a mira ku e hòmber na pia a sigui kana bai, miéntras e otro hòmber a keda sinta den e vehíkulo ku su motor sendé. Na momentu ku e agentenan a aserká e shofùr, por a konstatá ku e tabata mustra diferente karakterístika di un persona ku ta bou di influensia di alkohòl. A hasi un tèst di supla kuné for di kua a resultá ku el a konsumí mas alkohòl ku ta permití. A detené i hib’é warda di polis pa un análisis di rosea. A konsekuensia di e resultado di esaki a konfiská su reibeweis.
Atrako den Playa
Riba djaluna 29 di yüli, alrededor di 2 or di mardugá, a atraká un hòmber na altura di parke Wilhelmina den Playa. Miéntras e víktima a bai buska su baiskel na pia, un hòmber deskonosí a aserk’é i pidié pa sèn. Na momentu ku e víktima a kontestá ku e no ta duna sèn, e deskonosí a push’é. Seguidamente tres hòmber mas a bini i a atak’é. Esaki a pone ku e víktima a bai fo’i dje i bira inkonsiente. Na momentu ku e víktima a bini bei, el a konstatá ku a hòrta su baiskel eléktriko (Fatbike) i otro pertenensianan personal. Ta investigando e kaso.
KPCN ta pidi kualkier persona ku por a mira algu, a tende algu òf ku tin informashon tokante e sospechoso(nan) òf e insidente, pa tuma kontakto ku polis na 715 8000, 717 8000 òf via e liña di tep anónimo 9310.
