Notisia di polis di djárason 17 di mart te ku djabièrnè 19 di mart 2021
Aksidente entre dos outo di servisio di KPCN
Alrededor di 11or di anochi, riba djaweps 18 di mart, un aksidente a tuma lugá entre dos vehíkulo di Kuerpo Polisial Hulanda Karibense na altura di e krusada di Kaya Avelino J. Cecilia i Nikiboko Nort. E dos patruyanan aki tabata en buska di un vehíkulo ku a viola e ordenansa di emergensia na momentu ku na a dal den otro. Ambulans a transportá un víktima pa hospital pa tratamentu médiko i tres otro okupante mester a bai hospital pa kontrol médiko.
E departamentu di tráfiko i CRS ta enkargá ku e investigashon mas aleu.
A hòrta baiskel di ‘freestyle’
Riba djamars 17 di mart a drenta keho di ladronisia di baiskel di ‘freestyle’ koló pretu. E baiskel di ‘freestyle’ tin steker pega na e parti ariba i abou di e herante i ta spesial pa hasi kenshi. Doño di e baiskel, un mucha hòmber di 6 aña, i algun otro mucha tabata hungando pafó alrededor di 6.45 or di atardi na momentu ku un hóben di mas o ménos 13 aña a aserka nan pa fia e baiskel pa mustra nan algun kenshi. E mucha hòmber di 6 aña a bai di akuerdo. E hóben a mustra nan algun kenshi i despues a kore bai ku e baiskel. Ta investigando e kaso.
A desokupá bich
Den oranan di atardi riba djamars 17 di mart polis a risibí notifikashon ku mester tin un grupo grandi di hende na un bich situá na Bulevar E.E.G. Na yegada di e patruya a resultá ku tabata trata di un grupo di mas o ménos 70 persona, den awa i riba tera. A pidi tur hende pa bandoná e sitio. A pone wardakosta tambe na altura pa si akaso esnan ku tabata ‘kite surf’ den awa no duna oido na e òrdunan di polis.
Bo a mira algu sospechoso? Yama 717 8000 òf e liña di tep anónimo 717 7251.