Notisia di polis di djaluna 8 di yüli te ku djabièrnè 12 di yüli 2024
Detenshonnan pa manehá bou di influensia
Riba djabièrnè 12 di yüli, alrededor di 4.20 or di mardugá, a detené un hòmber di inisial W.H. di 59 aña di edat riba Bulevar Miguel A. Pourier pa manehá bou di influensia di alkohòl. E sospechoso tabata enbolbí den un aksidente. Konforme e maneho ‘botsen is blazen’, a hasi un tèst di supla ku e sospechoso. Debí na e resultado di esaki a detené i hib’é warda di polis pa un análisis di rosea. A konsekuensia di e resultado di esaki el a haña un prohibishon di manehá di 3 ora.
Riba djárason 10 di yüli, alrededor di 3.20 or di mardugá, a detené un hòmber di inisial G.R.C. di 66 aña di edat riba Kaya Gilberto F. (Betico) Croes pa manehá bou di influensia di alkohòl. Un patruya a mira e outo di e sospechoso tabata kore zeilu riba kaminda. A par’é pa un kòntròl rutinario i a dun’é òrdu pa mustra un reibeweis bálido i prueba di seguro. El a kumpli ku e petishon. Dor ku e tabata mustra diferente karakterístika di un persona ku ta bou di influensia di alkohòl, a hasi un tèst di supla kuné i a resultá ku el a konsumí mas alkohòl ku ta permití ora ta manehá un vehíkulo. Despues di kòntròl mas aleu a resultá ku anteriormente e aña aki, na febrüari, tambe a detené e sospechoso pa manehá bou di influensia di alkohòl i a konfiská su reibeweis e tempu ei. Algun siman pasá el a haña su reibeweis bèk. A detené i hib’é warda di polis pa un análisis di rosea. A konsekuensia di e resultado di esaki a bolbe konfiská su reibeweis.
Detenshon pa violashon Lei di Opio BES
Riba djaweps 11 di yüli, alrededor di 6.55 or di anochi, ‘meldkamer’ sentral a risibí notifikashon tokante un bringamentu ku tabata tumando lugá na un kompleho di apartamentu riba Kaya Breda. Na yegada di e patruya no tabatin bringamentu pero un pleitamentu. Despues di un investigashon mas aleu a topa un di e personanan enbolbí ku diferente saku di plèstik transparente ku supstansianan probablemente narkótiko. A detené e hòmber di inisial R.G.R.S. di 20 aña di edat riba sospecho di violashon di Lei di Opio BES. A konfiská esakinan pa investigashon mas aleu.
Ladronisia bòter di gas
Riba djaweps 11 di yüli a drenta keho di ladronisia di un bòter di gas for di den kurá di un kas na Kaya Iguaza. Na momentu ku e habitante a yega kas i a bai kushiná, el a konstatá ku deskonosínan a bai ku su bòter di gas. Ta investigando e kaso.
Detenshon
Riba djaweps 11 di yüli, alrededor di 12.55 or di mardugá, a detené e hòmber di inisial R.H.C. di 33 aña di edat den ‘Centrumgebied’ pa manehá bou di influensia di alkohòl, pa resistí detenshon i pa no sigui òrdu di polis.
Un patruya ku tabata kore riba un kaminda di preferensia, mester a wanta brek pa evitá un aksidente despues ku un outo ku tabata aserkando ku velosidat haltu i no a duna preferensia na e patruya. E outo a sigui kore i a lora dilanti di e patruya. Esaki a pone ku e patruya a bai su tras i a duna e shofùr señal pa para pa atendé kuné riba su komportashon di manehá. E shofùr a kumpli ku e petishon pa para. Durante kòntròl a pidi e shofùr pa mustra un reibeweis bálido, pero el a indiká ku e no tin reibeweis. Na momentu ku e pidi’é pa un prueba di identifikashon, e shofùr a duna di konosé ku e no tin niun dokumento huntu kuné. E tabata mustra diferente karakterístika di un persona ku ta bou di influensia di alkohòl.
A hasi un tèst di supla kuné i a resultá ku el a konsumí mas alkohòl ku ta permití ora ta manehá un vehíkulo. A informá e sospechoso ku e ta detené pa manehá bou di influensia di alkohòl i ku e mester kana huntu ku e agentenan bai na e outo di polis pa transport’é pa warda di polis.
Un di e agentenan a tene e sospechoso na su brasa ariba, despues di kua e sospechoso a lòs man di e agente a bisa e agentenan pa no mishi kuné. Despues di a kita su faha di seguridat den e vehíkulo polisial, habri e porta di outo i purba hui, un biaha mas e sospechoso a kita man di e agentenan for di dje.
Na e momentu ei, e sospechoso a pusha e agente polisial. E sospechoso tabata nenga subi den e outo di polis i tabata resistí fuertemente. Pa e motibu aki e agentenan a hañanan obligá di hasi uso di téknikanan apropiá i ‘pepperspray’ pa detené e sospechoso. A transport’é pa warda di polis.
Outo ta dal siklista
Riba djárason 10 di yüli, alrededor di 9.15 or di anochi, ‘meldkamer’ sentral a risibí notifikashon tokante un outo ku a dal un siklista riba Kaya Korona. Na yegada di e patruya i ambulans, personal di ambulans a kuminsá duna e víktima tratamentu.
E shofùr di e outo a deklará ku e tabata kore den direkshon nort i a mira un hòmber tabata kore baiskel riba asera na su man drechi. E baiskel tabatin un lus kòrá patras. E siklista tambe tabata kore den direkshon nort, pero diripiente a subi kaminda sin wak patras. E shofùr di e outo a purba desviá e siklista pa evitá un aksidente, pero el a tende un zonido fuerte i a dal e siklista tòg. El a spanta i a kore bai stashoná su vehíkulo algu mas leu. Ora el a baha for di outo, el a mira e víktima riba dak di su outo.
Konforme e maneho ‘botsen is blazen’, a hasi un tèst di supla ku e shofùr, ku un resultado negativo. A duna e shofùr but pa maneha sin seguro bálido i a hiba su outo warda di polis. Ambulans a transportá e víktima pa hòspital pa tratamentu médiko.
Entrada hudisial ku detenshon
Den oranan trempan di mainta riba djárason 10 di yüli, e tim di Kriminalidat Sibernétiko (Cybercrime Team) di Kuerpo Polisial Hulanda Karibense a tene un entrada hudisial den un kas situá na Amboina. E entrada hudisial tabata den kuadro di un investigashon tokante invashon di kòmpiuter (computervredebreuk), froude i labamentu di plaka. Durante di e entrada hudisial a detené un hòmber di 22 aña di edat i a konfiská algun artíkulo relevante pa e kaso. Investigashon den e kaso ta kontinuá.
