Notisia di polis di djaluna 25 di novèmber te ku djárason 27 di novèmber 2024
Detenshon pa manehá bou di influensia
Djamars 26 di novèmber, alrededor di 11.05 or di anochi, a detené un dama di inisial S.M.G. di 34 aña di edat riba Kaya Korona pa manehá bou di influensia di alkohòl. E sospechoso tabata enbolbí den un aksidente entre dos vehíkulo riba e kaya menshoná. Konforme e maneho ‘botsen is blazen’, a hasi un tèst di supla ku ámbos shofùr enbolbí i a resultá ku e sospechoso a konsumí mas alkohòl ku ta permití ora ta manehá un vehíkulo. A detené i a hib’é warda di polis pa un análisis di rosea. A konsekuensia di e resultado di esaki a konfiská su reibeweis.
Kiebro den kas
Djaluna 25 di novèmber a drenta keho di kiebro den un kas situá na Kaminda Djabou. Entre 10 or di mainta riba djabièrnè 22 di novèmber i 10 or di mainta riba djadumingu 24 di novèmber, deskonosínan a bai ku entre otro un wasmashin koló blanku, un frishidèr koló blanku di e marka LG, dos matras, dos èrko i un televishon di “42 inch” di e marka LG. Ta investigando e kaso.
Ladronisia na sitio di sambuyá
Djaluna 25 di novèmber a drenta keho di ladronisia na un sitio di sambuyá yamá ‘Angel City’ situá na E.E.G. Bulevar. Entre 10 or di mainta i 10.45 or di mainta, deskonosínan a bai ku un tas koló blou skur di e marka Paddle pecpel ku kontenido miéntras e doño tabata snòrkel. Den e tas tabatin entre otro dos brel di solo di e marka Rayban, un brel di bista di e marka Rayban, un ‘Powerbank’ di e marka Xtrom, paña i artíkulonan di sambuyá. Ta investigando e kaso.
Kiebro den negoshi
Djaluna 25 di novèmber a drenta keho di kiebro den un negoshi situá na Kaya Carlos A. Nicolaas. Entre 4 or di atardi riba djadumingu 24 di novèmber i 8.30 or di mainta riba djaluna 25 di novèmber, deskonosínan a bai ku un stòfzùiger di e marka Vacmaster i un mashin di preshon haltu (pressure washer) ku su motor di marka Karcher for di den un kònteiner. Ta investigando e kaso.
Djaluna 25 di novèmber a drenta keho di kiebro den un negoshi situá na Kaya Industria Pariba. Deskonosínan a bai ku entre otro sèn kèsh, vários hèrmènt (mashin di zag, un zag di man, mashin di bora, baterianan ku nan kargadó i un maleta ku vários hèrmènt. Ta investigando e kaso.
