Nos Shoco (Athene cunicularia arubensis) ta parti di nos simbolo nacional

E 𝐬𝐡𝐨𝐜𝐨 di Aruba ta e parha declara como nos simbolo nacional desde 2012. Su nomber cientifico ta 𝘈𝘵𝘩𝘦𝘯𝘦 𝘤𝘶𝘯𝘪𝘤𝘶𝘭𝘢𝘳𝘪𝘢𝘢𝘳𝘶𝘣𝘦𝘯𝘴𝘪𝘴. E shoco aki ta un sorto endemico pa Aruba, esaki kiermen ta hay’e solamente na Aruba p’esey e tin e palabra ‘arubensis’ den su nomber cientifico.

Na Hulandes nan ta yam’e ‘holenuil’, paso e ta coba un hol den tera y eyden e ta biba, broei y sconde. Tin biaha nan ta scoge un tuberia bashi pa biba aden y rond di e area unda tin acumulacion di santo.
Pone atencion paso tambe nan sa coba hol den un sero di santo den cura.

E shoco ta un parha jaagdo. E ta gara su presanan cu su garanan.
E shoco ta come raton, lagadishi y tambe insectonan. Su tamaño por yega te 20 centimeter. E shoco embra ta un poco mas pisa cu e macho. Su color ta bruin cla cu hopi pikpik blanco, bou su bariga y tambe por ta blanco of color creme.
Su wowonan ta color geel cu ta resalta. Shoconan por wak hopi bon den scuridad y por scucha bon.
Su pik (snavel) ta color geel/berde. Ora shoconan ta chikito nan no tin pleki blanco y nan color ta mas cla.
Un shoco por pone 1 of 2 webo pa dia te ora cu e pone tur su webonan. Despues di 3 pa 4 siman e webonan ta broei.
E shoco ta cuida su yiunan pa 3 luna te ora nan sali for di neishi. Mayoria biaha, for di e neishi ey ta solamente 1 of 2 ta sobrevivi. Un shoco por biba te 9 aña.

Ora nan ta sinti nan mes menasa of stroba, nan ta bula bay of sconde den nan hol. Shoco ta activo durante dia, pero ta mas activo ainda atardi y anochi. E menasa di mas grandi pa shoconan ta hende, cacho, pushi y e boanan.
(Texto saca for di Departamento di Naturalesa y Medio Ambiente DNM)

Riba dia 18 di maart 2012, e dia nacional di Aruba, e Shoco (Athenecunicularia arubensis) a keda oficialmente introduci como simbolo nacional.
E shoco unico aki ta simbolisa sabiduria y inteligencia.
Athene cunicularia arubensis ta un sorto di shoco chikito di 18 pa 25 cm largo cu ta menos activo durante dia y ta jaag riba insecto grandi, entre otro tor, tiracochi y otro insecto.
E shoco ta uza un hol chikito den tera pa traha su neishi. Na Ingles e ta ser yama ‘Burrowing owl’. Hopi biaha e shoco ta para dilanti entrada di su hol riba un sero di santo of un rama di palo.

Shoco ta un especie di parha endemico, un sorto cu solamente ta haya na Aruba. E Shoco (Athene cunicularia arubensis) ta masha popular y tambe un pintura di e shoco a wordo uza riba nos placa di papel di 50 florin (antes). Y awor ta el’a wordo uza pa imprimi riba nos placa di papel di 25 florin.

Como cu nos shoco ta e parha di un sorto endemico, nos mester proteh’e y cuid’e pa conserva su sobrevivencia. Arubiano, sinti bo orguyoso di nos Shoco como simbolo nacional.

Potret di shoco ta cortesia di: Aruba Bird Life Conservation.