Na comienso di e dia cu IPKO a inicia, presidente di Parlamento, drs. Mervin Wyatt-Ras, despues di e discurso di e Presidente di Eerste Kamer, a duna tambe un discurso. El a trece p’adilanti cu desde ultimo reunion tabatin eleccion na Corsou y Hulanda. E delegacionnan a cambia. Na Aruba lo tin eleccion na September venidero. Tin diferente reto di e diferente paisnan, p.e. formacion di Gobierno di Hulanda. Apesar di esaki nada no por stroba nos como representante di pueblo pa duna interes general prioridad. E delegacion di Aruba ta di opinion cu IPKO ta un instrumento importante pa fortifica nos lasonan den Reino den cualkier constelacion cu nos por ta. Cada partner ta pasa door di cambio. Segun cu nos partnernan den Reino construi nan propio identidad, nos mester keda mantene un plataforma den cual a base di respet y igualdad por topa otro y na un forma obhetivo por discuti tocante diferencia di opinion y bin cu solucionnan.
Nos tarea ta keda pa respresenta nos comunidadnan cu e meta final crea un reino fuerte y uni. Deseo di nos delegacion ta pa nos haci bon uzo di e dianan pa hiba combersacionnan constructivo tocante diferente topico. Un topico importante ta “geschillenregeling”. Nos paisnan lo por progresa door di traha hunto. Nos tin cu keda comunica cu otro a base di igualdad y respet mutuo.