Pa lider di RED, Ricardo Croes, e momento di eleccion 2017 no ta ora di fiesta sino ta ora di para keto y wak e desaroyonan cu ta biba den nos comunidad di Aruba.
El a splica cu diabierna a bay bon. Croes tabata contento y toch e dia tabata uno emociona, mirando e entrevista y preguntanan cu ta wordo haci, e preocupacion cu ta reina, di parti di e periodistanan y tambe e calidad di preguntanan cu ta bin dilanti. Pero tambe pa mira con e hendenan hunto ta bin pa ricibi e partidonan. Pa RED e tabata un dia grandi. A canta nan himno di Aruba, cu a pone nan sinti nan mes masha bon den comparacion cu otro partidonan grandi, manera cos ta un periodo di carnaval tin.
Pa RED esaki no ta un periodo di fiesta, sino di preocupacion. Gobernacion na Aruba no ta e miho cu tin y a base di resultado di criminalidad, enseñansa y ningun transparencia.
Croes a sigui splica cu no tin un partido cu por satisface deseo di tur hende. Tur ta traha duro purbando pa tin un lista cu tin un combinacion di specialidad riba dje. A logra esaki y te cu awor aki tin cu bisa cu RED ta sinti un acogida den pueblo, pa loke ta e lista cu nan tin. Dia 22 di September lo haya sa e realidad.
Por ultimo Croes a mustra cu e reto ta pa colecta 578 firma pa nan por participa na e siguiente eleccion. Manera cu tur hende sa, ta dos partido so no mester colecta firma e aña aki, cual ta esunnan cu ta den Parlamento y Gobierno, cu excepcion di POR, cu tin Andin Bikker eyriba, pero tambe mester a colecta firma.
Kier a haci un yamada na tur sostenedor, pa no laga den man di otro hende pa bin firma, pensando cu tin suficiente. Bin tempran, bin firma y pasa cerca RED pa asina nan por participa na eleccion 2017.