Pa loke ta Green Corridor, tin basta desaroyo cu nos lo bay conoce den e dianan nos dilanti. Jossy Kock di DOW ta splica cu actualmente e contratista ta bezig na e brug chikito di Mahuma, na unda cu actualmente e ta trahando e balkinan principal cu tin cu bay sostene e parti ariba di e brug chikito aki pa asina e trafico por pasa riba dje.
Tambe e crusada di Mahuma mes, manera cu por a ripara, e prome parti di e rotonde di Mahuma ya caba ta cla y dentro di dos siman esaki lo bay wordo habri parcialmente, mescos cu tin na Sero Tijshi, unda e ora ey e compania lo bay concentra riba e parti drechi di e rotonde, pa asina por forma y cerca e parti di e rotonde aki.
Encarecidamente di parti di DOW, ta pidi pa e publico, vooral e automobilistanan cu ta haciendo uzo di e caminda principal, cu aki dos siman ta bay tin cambio di trafico den e seccion aki y pa tene debido cuenta cu esaki y pa reduci velocidad na unda cu esaki ta wordo indica door di borchinan di trafico.
E rotonde di Sero Tijshi lo bay habri tambe aki dos siman. Esey ta en conexion tambe, mirando cu ta bay cera e parti di Mahuma, Sero Tijshi lo bay den funcion. Akinan tambe encarecidamente ta pidi automobilistanan pa tene cuenta cu e cambionan cu ta bay tin eyriba, cu ta bay wordo indica riba e borchinan di trafico y desvionan. Ta asina cu entre crusada di Mahuma y Sero Tijshi, automobilistanan lo tin cu bay haci uzo di e caminda nobo, cu lo bay ta den funcion. E dos conexionnan aki lo bay ta den uzo pa tur trafico e momento ey, pa asina e contratista tin e oportunidad, cu e por traha riba e rotonde di Mahuma y tambe riba e caminda existente entre rotonde Mahuma y Sero Tijshi.
Pa e motibo aki atrobe ta pidi pa e automobilistanan tene bon cuenta cu e cambionan di trafico cu lo bay tin. Esakinan ta minimo, pero paga bon tino ora cu ta yegando na e crusadanan aki.
Siguiendo bay ariba actualmente, e contratista tambe ta bezig na e rotonde di Kibaima. Esaki a cuminsa forma caba pa banda panort y manera cu e parti aki keda cla lo bay haci e cambionan necesario.
Tocante e brug mes di Spaans Lagoen, e siman cu a caba di pasa, esta diadomingo y diaranson, e contratista a logra di cera full e brug su concepcion principal. E arco tur dos banda a wordo cera. Por cierto e prome banda a sosode diadomingo y e di dos a sosode diaranson cu a pasa, formalisando full e conexionnan di e arco y e sostennan tambe a wordo conecta, segun Kock.