Nos leynan ta prohibi core y haci daño na nos beachnan

Despues cu Directie Natuur en Milieu (DNM) a ricibi bastante keho via pagina social, yamadanan telefonico, como tambe via e plataforma Infraruba.com, DNM a tuma accion.
A tuma e decision pa manda un carta na tur e tour operators, ranchonan cu ta sali cu turista riba cabay, y companianan cu ta huur tanto auto y all terrain vehicles (ATV’s).

E keho principal tawata trata di chauffeurnan cu NO ta na altura di reglanan stipula pa ley. Esaki specificamente tin di haber cu hendenan ta core ariba santo blanco (costanan) y asina destruyendo nos recurso natural y e organismonan cu ta biba na nos costanan.
E comportacion aki ta trece cune e falta di respet pa Aruba su naturalesa. E grupo di usuarionan aki, hopi biaha ta laga sushedad atras y no ta deshaci di esaki den e lugar asigna, cu ta un bari of hiba esaki bek cu nan.
Den e carta aki DNM a menciona 2 articulonan di nos ley Decreto Nacional Playanan y Costanan Publico (Landsbesluit openbare wateren en stranden) art 25 y art 30. Articulo 25 specificamente ta prohibi pa core of pasa riba nos costanan cu vehiculonan di motor, baisnan y of bestianan (rij-of trekdieren). Articulo 30 ta specifica cu ta prohibi pa tira/benta/deshaci/laga ataras materialnan cu ta clasifica como sushedad e.o di boternan, verpakkingsmaterial y of otro materialnan den playanan of riba costanan.
DNM ta haci un yamada di urgencia no solamnete na e tour operatorsnan, tambe publico en general, pa tene cuenta cu nos leynan y respeta nos recoursonan natural.
TA PROHIBI PA CORE OF PARA ARIBA COSTANAN
TA PROHIBI PA TIRA OF LAGA ATRAS SHUSHEDAD NA NOS COSTANAN Y DEN E AWANAN(LAMA)
DNM ta recorda un y tur cu si bo wak un acto ilegal bo por notifica polis pa tuma accion inmediato y por notifica esaki riba e plataforma: Infraruba.com cu potret y luga cu esaki a tuma luga.
DNM ta tuma e oportunidad pa gradici KPA, OM, AHATA, ATA, KVK y Blue Blocks Aruba pa nan cooperacion. Cu e informacion aki publica, DNM ta considera cu tur usuario ta bon na altura di nos leynan. Asina nos ta conta cu un y tur lo yuda mantene Aruba limpi y nos costanan liber di trafico pa No stroba naturalesa y e organismonan cu ta biba eynan.

Comments

comments