Den añanan 1975 y 1976 deseo a nace cerca e Gobierno di e tempo ey, pa duna Aruba su propio Himno Nacional y su propio bandera ya cu Himno y Bandera di un pais ta simbolonan mas valioso cu por inspira un pueblo pa demostra sentimentonan di amor y patriotismo.
Tabata Sr. Gilberto François “Betico” Croes cu a pidi Gobierno pa bini cu e simbolonan di un pueblo: Himno y Bandera.
“Aruba Dushi Tera” ta e titulo di e Himno Nacional di Aruba. E historia di e cancion cu a bira nos himno nacional ta data for di 1951. Dos musico conoci, Sr. Rufo Wever y Sr. Juan Chabaya “Padu” Lampe ta esnan cu a compone y graba e ritmo y melodia tipico di Aruba. Nan a graba varios piesa e tempo ey riba disco y a percura pa hopi composicion di antaño no bay perdi. Ambos ta dos baluarte di nos musica Arubano te cu awe. Hopi ta esnan cu te ainda ta gusta scucha e musiconan clasico aki.
Na aña 1952 e dos musiconan Srs. Wever y Lampe a compone nos actual himno di Aruba. Nan a sinti e necesidad pa compone un piesa cual lo mester expresa e amor di nos pueblo pa nos isla y lanta e sentimento patriotico di cada persona. Cu “De Trupialen” bou direccion di Frère Alexius, a hinca e cancion aki den nan repertorio y asina e canto aki a resona. E popularidad di e cancion aki a bira mas grandi ora cu na 1954 riba iniciativa di Frère Alexius, Radio Kelkboom a graba e cancion riba un disco 78 rpm, canta pa coro “De Trupialen” y compaña riba piano pa Padu Lampe. Su popularidad a crece den pueblo y a haci cu spontaneamente casi tur instancia priva y ceremonia oficial tabata uza “Aruba Dushi Tera” na tur ocasion importante.
Den añanan ’70 Gobierno a instala un comision consistiendo di Maybeline Arends-Croes, Rufo Odor, Padu Lampe, Eddy Bennet, Hubert “Lio” Booi y Rufo Wever cu mester a evalua si por proclama “Aruba Dushi Tera” como nos himno. Unanimamente a haci un recomendacion riba dia 25 di februari 1976 pa uza “Aruba Dushi Tera” como nos Himno Nacional y den ritmo di wals. E comision a propone pa añadi un couplet mas na e cancion. Sr. Hubert “Lio” Booi, cu su inspiración, a añadi na e ultimo couplet e frase: “…cu Dios por guia y conserva su amor pa libertad.” Cu e frase aki e ta elogia e gran cordialidad di e pueblo di Aruba y su amor pa libertad.
Riba dia 16 di maart 1976, Parlamento Teritorio Insular di Aruba (Eilandsraad), a aproba “Aruba Dushi Tera”, como Himno Oficial di Aruba. Dia 18 di maart 1976, durante un acto oficial, organisa pa Gobierno di Aruba, den Wilhelmina Stadion (awe Stadion Guillermo Prospero Trinidad) na Dakota y den presencia di un multitud grandi, a proclama “Aruba Dushi Tera”, cu pa prome biaha a resona como e Himno Nacional di Aruba. Tabata un presentacion bou guia di Sra. Maybeline Arends-Croes cu acompañamento di orkesta filharmonico di Aruba dirigi pa Sr. Joy Kock.
Lirica di “Aruba Dushi Tera”:
1. Aruba patria aprecia,
nos cuna venera,
chikito y simpel bo por ta
pero si respeta.
Refrein: O, Aruba, Dushi tera,
nos baranca tan stima
nos amor pa bo t’asina grandi
cu n’tin nada pa kibre!
2. Bo playanan tan admira
cu palma tur dorna,
bo escudo y bandera ta
orguyo di nos tur!
Refrein: O, Aruba, Dushi tera, etc.
nos baranca tan stima.
nos amor pa bo t’asina grandi
cu n’tin nada pa kibr’e!
3. Grandesa di bo pueblo ta
su gran cordialidad,
cu Dios por guia y conserva
su amor pa libertad!
Refrein: O, Aruba , dushi tera,
nos baranca tan stima.
Nos amor pa bo t’ asina grandi
cu n’tin nada pa kibr’e!
cu n’tin nada pa kibr’e!
E simbolonan di identidad di nos pais ta nos himno, nos bandera, p’esey ta un deber di tur cuidadano di canta nos himno nacional.
