Els van Homelen, director di Stichting voor Verstandelijk Gehandicapten Aruba, ta comenta tocante e oportunidadnan cu hendenan special tin por medio di e cooperacion entre e fundacionnan encarga cu nan y e falta di vivienda pa tanto mucha y adulto special.
Sra. Van Homelen ta splica cu normalmente ora muchanan special caba Scol Dununman y nan ta pas na un di nan departamentonan manera Briyo di Solo of Centro Man na Obra por ehempel, nan ta wordo manda na un di esakinan. P’e departamentonan ey tin cierto muchanan cu ta funciona basta halto, e ora nan ta pas mas pa un trabou. Dus asina tambe ta un cooperacion cu otro fundacionnan p’asina cada grupo di hendenan special tin algo. Esey mester sluit aan bon, p’esey nan no kier tin mucho overlap cu otro fundacionnan, pero nan kier yuda otro pa cada un tin algo. E ta un realidad cu comunidad ta sigui crece y nan clientenan tambe ta crece.
Locual nan como fundacion ta haci ta busca cooperacion cu otro fundacionnan. E aña aki na April, e grandinan di Briyo di Solo y Centro Man na Obra a bay na un proyecto di Stichting Ambiente Nobo. Pero e necesidad mas grandi cu tin na Aruba ta pa vivienda y den e plan di Crisis Social tin poni extra cen pa bin cu vivienda pa mucha y adulto. Tin entendi cu e placa no a yega ainda, pero nan ta spera cu esey por wordo soluciona, pasobra e ta un problema hopi grandi mes, tin hopi necesidad pa hendenan special tambe haya un facilidad pa biba. Si tuma ehempel di Corsou, nan tin mas di 300 luga pa hendenan special biba, mientras na Aruba tin 30 luga. Tambe den luz di e casonan di abuso cu ta creciendo na Aruba, e hendenan special tambe ta bira victima di abuso y no tin luga pa hiba nan. E placa ta poni den e Crisis Plan, pero e placa mester por ta disponibel pronto pa nan por brinda e servicio y proteha e hendenan cu tin necesidad di dje.
Sra. Van Homelen tambe ta indica cu tin mayornan ta meld nan yiunan trempan. Cu dos aña nan por drenta Bibito Pin y cu cuater aña nan por drenta Scol Dununman. E ta depende di e nivel di e mucha pa determina cua departamento nan mester bay. Y despues nan por sigui cerca Stichting voor Verstandelijk Gehandicapten Aruba. Y si nan sali di Bibito Pin, mester wak si tin luga pa nan na Briyo di Solo. Dor di e cooperacion cu otro fundacionnan, nan ta logra duna e muchanan un oportunidad.