Masnoticia a puntra Irene Croes, Veterinario, si e problema di cacho riba caya na Aruba ta uno mastanto financiero mirando cu te ainda nos no tin esaki completamente bao di control ainda. E veterinario ta bisa cu aki na Hulanda por ehempel – cu nos por mira e situacion di cacho riba caya ta hopi mas miho regla den comparacion cu aki – un mascota ta parti di e famia. Pero akinan na Aruba ta busca cacho pa cuida bo cura y bo cas, no tin e mesun ‘bond’ cu tin cu e animalnan por ehempel na Hulanda.
Leynan eynan tambe ta un tiki mas severo, e control tambe. “Mi no ta bisa cu nos no lo por yega eynan pasobra cu hasta esey mi a hinca den adviesnan cu a bay pa minister pa bin cu un obligacion si mester pa sterilisa bo mascota.”
Si bo no kier sterilisa bo macota, e ora ey automaticamente bo ta bira un ‘breeder’ y bo tin cu bay paga cierto impuesto. Hasta asina leu a pensa riba dje pa si por sikiera logra haya tur mascota na Aruba registra obligatoriamente, eynan caba nos ta un paso hopi mas leu. E ora ey lo por track ken sea cu ta cu tin nan bestia riba caya.
Tin paisnan na unda cu bo ta haya multa si bo djis deshaci di bo cacho y bent’e riba caya, si nos mester yega eynan nos lo yega eynan segun sra. Croes, pero “na Aruba nos tin hopi doño irresponsabel, e ta na cada un di nos pa tuma nos responsabilidad pa cu nos mascota.”
E veterinario ta expresa cu e ta un tiki fastioso cu den comparacion cu Hulanda cu ta un pais mas grandi, y nos cu ta asina chikito, tur cos ta bon maneha riba e parti aki pero akinan ainda nos falta hopi pero nos tambe por. “Nos tin cu duna di nos mes pa bay eynan.”