Durante lunanan di Maart y April di e aña aki, Aruba Tourism Authority a conduci un estudio bou pasaheronan di crucero pa asina midi e patronchi di gasto y nan habito di viaje. Ademas, e estudio a explora kico e posibilidad ta cu un pasahero crucero lo por converti den un bishitante stay-over. Tambe a haci preguntanan pa compronde con satisfecho e pasaheronan ta cu Aruba como destinacion. Pa completa e estudio riba e pasahero crucero, tambe a explora kico lo por ta aspectonan cu nos isla por traha riba dje pa asina mehora e bishita riba nos isla. En total 460 bishitante crucero a participa den e encuesta aki.
Patronchi di Gasto
Mayoria di esnan cu a tuma parti na e encuesta a indica cu nan consumo riba nos isla ta bay na compra di cuminda y bebida (45%), compra di souvenirs (45%), compra di chuculati, alcohol y naturalmente e famoso keshi Hulandes (33%). Na averahe un bishitante crucero ta gasta 121.73 USD riba nos isla. Esaki ta inclui actividadnan prepaga (compra riba barco crucero). Ademas, e estudio ta indica cu gran parti (26%) di e pasahero crucero su presupuesto ta bay na compra di chuculati, alcohol, keshi Hulandes y otro articulonan. Esaki ta sigui pa compra di joyas (24%), 12% na actividadnan prepaga y 9% na cuminda y bebida pafor di e barco crusero. Ora exclui actividadnan prepaga e montante cu ta gasta durante nan estadia ta di 108,06 USD.
Satisfaccion pa cu Aruba
55% a indica di ta sumamente satisfecho cu Aruba como destinacion y cu 36% a indica di ta satisfecho cu Aruba. E amabilidad di nos habitantenan, nos famoso playanan, y e seguridad cu nos isla ta brinda a score halto bou e pasaheronan crucero. Punto nan di mehoracion ta enfoca riba amplia e variedad di oferta di cuminda y bebida, variedad di shopping y di tambe excursionan. Tur mester ta mas diverso.
Mayoria (63%) di esnan cu a participa na e encuesta a indica cu nan lo recomenda Aruba na famia y conocinan. Ademas, resultado ta indica cu e nomber di Aruba riba e itinerario tin hopi influencia riba nan escogencia. 66% a indica cu Aruba como parti di e ruta tabata e motibo principal pa a scoge e itinerario.
Probabilidad Pa Regresa Aruba
48% di esnan encuesta a indica cu nan lo probablemente regresa Aruba riba un barco crucero. 35% a indica di ta interesa pa regresa Aruba pero e biaha aki cu avion.
Aruba Tourism Authority lo continua cu e estudio aki den e high-season di 2016 y tambe durante 2017. Esaki ta pa sigui midi e patronchi di gasto di e pasahero crucero, nan satisfaccion cu nos isla como destinacion, y pa asina gara puntonan di mehoracion. Asina ki Aruba Tourism Authority por percura cu Aruba ta mantene su posicion como un di e miho destinacionan den Caribe.