Dialuna mainta, tabata tin sentencia den e caso di DOW contra di su ex empleada, Noraima Andrade. Tin varios straf disciplinario andando contra di dje, como tambe peticion di retiro contra su persona.
CASO
Sra. Noraima Andrade tabata traha na Riool en Waterzuiver Installatie di DOW, unda cu un fin di siman el a bandona pia di trabao, caminda cu pa dianan largo, e awa preto a basha bay den lama. E no a notifica di esaki. Na momento cu e incidente aki a tuma lugar, e director encuestion a opta pa ‘schors’ e empleada aki pa e blunder cu el a comete y hasta pa falta di negligencia di no a haci su trabao corecto. Pero despues di e incidente ey, el a bay ter beschikking di e Ministerio di Ruimtelijke Ontwikkeling, Infrastructuur & Integracion, den gobernacion di Gabinete Mike Eman II. Despues di cu su periodo di ‘ter beschikking’ a termina, e no a presenta bek na su trabao anterior. Ttabata tin diferente momentonan cu e no a cumpli cu su trabao, y hasta a nenga di presenta na trabao. Dia 13 di november, DOW ta manda un carta pa Sra. Andrade unda cu e ta wordo pidi pa meld na Departamento di Recurso Humano (DHR) y cu e lo haya un overplaatsing pa Ministerio Publico.
Na diferente ocasion a pidi Sra. Andrade pa presenta na pia di trabao, cual e no a haci. Despues e ta pidi ides dia di vakanti, cual a wordo otorga na dje, pa asina e por regla su overplaatsing. Despues di su 10 dianan di vakantie, atrobe e señora aki no ta presenta na pia di trabao. Un biaha mas e ta wordo pidi pa presenta na pia di trabao dia 3 di januari 2018. Sra. Andrade ta bay AO te cu dia 12 di februari 2018. E ta pidi vakantie pa dia 13 di februari te cu 18 di februari, cual un biaha mas ta wordo concedi na dje.
Dia 19 di februari, Sra. Andrade, un biaha mas ta bay AO pa dos dia. Den un carta di dia 20 di februari 2018, Sra. Andrade ta informa DHR cu e no ta desea di regresa DOW y cu e lo keda en espera di un otro overplaatsing, den un posicion similar.
Ora cu DOW (Land Aruba) a informa Sra. Andrade cu lo tuma su salario den beslag, el a dicidi di busca su derecho den corte. El a pidi hues pa schors e beschikking di dia 29 di maart (ta para su salario) y pa DOW (Land Aruba), como medida provisional sigui paga su salario tanten cu e ta ambtenaar y cu no tin un decision ainda den bodemprocedure.
Pero e hecho cu Sra. Andrade no a cumpli cu e peticionnan pa meld na DOW, y cu esaki, deliberadamente en contra di su obligacionnan como ambtenaar, y hues ta confirma esaki.
No tabata tin niun hustificacion pa Sra. Andrade no presenta na trabao, a pesar cu Sra. Andrade ta haya cu si, ya cu segun su persona, den consulta cu DHR, e mester a warda ariba un decision tocante su overplaarsing na Directie Volksgezondheid y tambe pa motibo cu Sra. Andrade a mustra cu e lo no por haya su posicion bieu bek, ya cu esaki lo a wordo yena caba. Pero abogado di DOW (Land Aruba) ta mustra ariba e hecho cu Sra. Andrade nunca a averigua na DOW si encaso su posicion ainda tabata habri. E no tabata tin permiso pa warda riba su overplaatsing na cas.
Asina pues, hues mr. E.M.D. Angela a duna gobierno di Aruba, e caso gana y pa cual awo e proceduranan lo continua pa loke ta e strafnan disciplinario contra di Sra. Noraima Andrade.