PYONGYANG, Noord – Korea – Pyongyang a test un arma “ultramoderno recien desaroya” durante un evento supervisa pa lider di e pais Kim Jong Un, segun prensa estatal a informa diabierna, mei mei di negociacionnan di desarme dudoso cu Merca.
Masha poco ta conoci tocante e arma menciona of si realmente e ta algo nobo, pero e prueba ta e señal mas recien, di cu Pyongyang ta preparando su mes pa un relacion mas militarista cu Washington si acaso e negociacionnan no avansa.
“Poco poco Pyongyang ta bayendo pa un postura mas agresivo den e negociacionnan cu Merca y cu ta indicando cu e no lo cede y cu posiblemente e lo , bay bek na su practicanan bieu si Merca no cambia su focus”, Josh Pollack, investigado asocia den e Instituto di Estudionan Internacional na Middlebury en Monterey, a declara na CNN.
E agencia estatal Norcoreano KCNA a anuncia e prueba diabierna mainta sin ofrece detayenan riba e ubicacion den e evento y cu masha poco informacion riba e arma, solamente cu e ta un arma “ tactico” y cu a wordo ordena “ personalmente pa e tata di Kim y su predecesor Kim Jong Il.
Esaki ta e prome biaha desde cu Kim ta asisti publicamente na un evento militar di e taya aki desde su reunionnan di alto perfil cu e presidente di Corea del Sur, Moon Jae-in, y di Merca, Donald Trump, na comienso di 2018.
A pesar di speransanan halto di un avanza grandi despues di e cumbrenan internacional cu Moon y Trump, poco progreso a wordo logra den e ultimo lunanan.