PYONGYANG, Noord- Korea- Diamars e agencia di noticia di Zuid- Korea, Yonhap a informa cu e Noord- Korea a lansa otro misil balistico.
Según e agencia, e informacion a wordo confirma pa e Hunta di Hefenan di Estado Mayor di Zuid- Korea y nan ta analisando e detayenan cu Merca.
Pentagono di Merca a informa cu un posibel lansamento di misil a wordo detecta.
Robert Manning, vocero di Pentagono, a señala cu nan ta “den proceso di evalua e situacion y lo duna tur informacion adicional ora cu esakinan ta disponibel”.
Presidente di Merca, Donald Trump a haya sa di e situacion ora cu e misil tabata den laira caba.
E accion aki a provoca cu Japon a yama un reunion di emergencia di gabinete y a expresa un protesta energetico.
E misil a bula den direccion oost y a sali di e provincia di Pyongyang Zuid. E lo a cay den e zona economico exclusivo di e lama di Japon.
E ultimo lansamento di misil cu Noord- Korea a haci tabata mei mei di September y el a pasa ariba Japon. Dor di esaki varios pais ta monitor e situacion belico di e regimen di Kim Jong Un.