PYONGYANG, Noord Korea – Noord Korea a adverti Merca diasabra cu e lo “paga caro” si e bolbe pon’e riba e lista di paisnan cu ta fomenta terorismo, tras e asesinato di e ruman di e lider Noord Koreano, Kim Jong-un na Malasia.
“Merca lo bay conoce e prijs halto pa paga pa su acusacionnan sin base” contra Noord Korea si e bolbe pone den e lista, e vocero di e ministerio di Relacionnan Exterior Noord Koreano a bisa, cita pa e agencia oficial KCNA.
E vocero a sigura cu Pyongyang ta opone na “tur e formanan di terorismo” y a acusa Merca di kier daña su reputacion.
Kim Jong-nam, di 45 aña, a wordo asesina dia 13 di Februari den e aeropuerto di Kuala Lumpur, den un atake cu e agente nervioso VX, considera un arma di destruccion masivo.
Ri Jong-chol, un di e ocho Noord Koreanonan sospechoso di ta involucra den e asesinato, a bisa na algun periodista na Peking, cu e investigacion riba e caso realisa pa Malasia tabata un “conspiracion” contra Pyongyang.
Varios medio di Zuid Korea y Hapon, citando fuentenan diplomatico, a indica cu Merca ta considerando e posibilidad di inclui Noord Korea den su blacklist, actualmente integra pa Iran y Siria.
Noord Korea a wordo inclui den e lista na 1987, ora cu su agentenan a pone un bom den un avion Zuid Koreano, matando 115 persona cu tabata abordo. Na 2008, e pais comunista a wordo retira pa Washington for di su blacklist, despues cu el a acepta detene e desaroyo di su instalacionnan nuclear.
Noord Korea lo ta tema prioritario den e agenda di e proximo gira di e secretario di Estado mericano Rex Tillerson na Asia, kende e luna aki lo bishita Hapon, China y Zuid Korea.
Segun medionan Hapones, Tillerson lo ta na Hapon dianan 17 y 18 di Maart, den e prome escala di su gira, e prome den Asia di e titular di e diplomacia mericano desde e yegada di Donald Trump na Cas Blanco.
Fuente: Globedia