PYONGYANG, Noord Korea – Noord Korea a menasa Merca pa “sink full su teritorio bao di awa” den caso cu Washington purba di invadi e pais Asiatico, mey mey di tensionnan incesante entre ambos parti.
E regimen cu Kim Jong-Un ta lidera, a manda un advertencia a trabes di su medionan oficial, coincidiendo cu e celebracion di e Dia Nacional di su Ehercito Naval y despues cu ehecuta diasabra ultimo un test nobo cu misilnan balistico di corto alcance.
“E forsa naval (Noord Koreano) invencibel ta uni den su determinacion di sink e totalidad di Merca bao di e awa si e pais aki trece nubianan di guera of di agresion na nos teritorio,” e corant Rodong Sinmun den un articulo publica awe a señala.
E texto titula “Solamente victoria y gloria ta p’adilanti di e Forsanan Arma Naval autonomo”, a keda publica cu e motibo di e celebracion di e di 68 aniversario di e establecimento di dicho rama di e Ehercito Noord Koreano.
Den e corant oficial di e Partido Noord Koreano di trahadonan tambe ta destaca cu e pais aki “ta ora capas di puñala e lomba di Zuid Korea y di Merca cu e daga di destruccion den e momento cu nan ta desa,” danki na su tecnologia di misilnan balistico lansa for di un submarino na April di aña pasa.
E ultimo ensayo Noord Koreano di misil, a tuma luga diasabra, ora cu Pyongyang a manda tres proyectil balistico di corto alcance den e awanan di e Lama di Hapon, tras casi un luna di silencio armamentistico y despues di e tension escala entre ambos pais.
E test aki a sigui e prome prueba exitoso di un misil balistico intercontinental, dia 4 di Juli di parti di Noord Korea y a bal e pais Asiatico hermetico aki, un pakete di sancionnan nobo di Nacionnan Uni.
Fuente: www.laopinion.com