Diaranson awor 28 di September ta cuminsa cu Nobena Nacional na honor di nos Patrona stima Santisima Birgen di Alto Vista. Nos pais mester di hopi oracion. Ban uni forsa.
E siman aki ta un siman grandi pa tur Catolico na Aruba; ta e siman cu nos ta cuminsa cu e Nobena Nacional na honor di nos Patrona Santisima Mama Maria Birgen di Alto Vista. Tur parokia a uni forsa pa duna nos Patrona un bunita homenahe y celebracion.
Tur pais di mundo, apesar cu nan tin otro religion, tin Mama Maria como nan Patrona, kisa bou di otro nomber y Aruba tin su Patrona Mama Maria di Alto Vista.
E Nobena Nacional ta tuma lugar tur dia na Kapel di Alto Vista mes y ta cuminsa pa 5:30’or di atardi, sigui pa Santo Sacrificio di Misa canta.
E siguiente parokianan ta na turno: Dia 28 di September parokia di Noord, dia 29 di September parokia di Tanki Leendert, dia 30 di September parokia di Dakota, dia 1 di October parokia di Paradera, dia 2 di October parokia di Sta. Cruz, dia 3 di October parokia di Savaneta, dia 4 di October parokia di San Nicolas, dia 5 di October parokia di Brazil y dia 6 di October parokia di Playa, si nan participa.
Dia 7 di October ta e fiesta grandi mes y lo cuminsa cu un procesion for di pia di Sero di Alto Vista cu participacion di tur parokia di nos pais cu nan respectivo patrona/o. E parokianan ta ser acompaña pa gruponan uniforma, gruponan di oracion, gruponan deportivo, gruponan social, muchanan di scol, muchanan cu a caba di haci nan prome Santa Comunion y hobennan cu ta bay haci nan Confirmacion. Tambe nos ta invita polis, douane, cuerpo di bombero, scol di polis, mariniers, imigrantenan di Venezuela, Colombia, Haiti, Republica Dominicana, Filipinas, Peru, China, Suriname etc. y tur esnan cu a scoge Aruba como nan segundo patria pa tuma parti na e procesion y celebracion.
Despues di procesion ta sigui un misa solem cu asistencia di Monseigneur y tur Pastoor di nos pais. Tin un coro Nacional, dirigi pa señora Mechy Croes-Garido. E misa a ser compone pa señor Michael Thode.
Aruba berdaderamente ta di fiesta y un suplica ta bay pa pueblo, specialmente e pueblo di Noord hisa nos bandera ariba dia 7 di Octobber.
Ta bon pa menciona cu despues di e ultimo dia di nobena dia 6 di October lo sigui vigilia door di tur parokia di nos pais y gruponan di oracion cu ta desea di participa. Di 7’or pa 8:15 Savaneta cu Brazil, 8:15 pa 9:30 San Nicolas cu Santa Cruz, 9:30 pa 10:45 Dakota y Paradera, 10:45 pa 12’or Noord y Tanki Leendert. Aki Pastoor di Savaneta Pastoor Andres lo duna bendicion cu Sagrado Santisimo, Cristo biBo.
Despues di misa dia 28 di September Pastoor Santiago di Noord ta habri e gran celebracion, declarando cu Kapel lo keda habri 24 ora pa dia. Nos mester gradici Minister Arthur Dowers, kende a pone CEA na desposicion di e comite Nacional pa asina tin vigilancia 24 ora pa dia. Tambe Cerd n.v. a coopera cu luz y delco.
Tur e dianan di nobena nos lo resa pa paz mundial, pa paz aki na Aruba, pa tur famia di mundo y Aruba, pa proteccion di nos muchanan, pa e hobennan, kendenan ta bay haci nan examen, pa Mama Maria sigui intercede pa nos, mirando cu mundo y nos pais ta pasando den problemanan grave
Mama Maria di Alto Vista ta invita boso, bin celebra hunto cun’E.