No tur ora reserva grandi di petroleo ta sinonimo di rikesa pa e paisnan

Awendia, petroleo ta sigui di ta e fuente principal di energia cu ta pone e mundo den cual nos ta biba, funciona.

Y te ora cu energianan renovabel no logra substitui e asina yama oro preto, nos lo sigui depende di dje.

Na 2018, es mas, nos a consumi mas petroleo cu cualkier otro aña. Segun datonan di e Organisacion di Paisnan Exportador di Petroleo (OPEP), e consumo diario na nivel global tabata ta di 98,82 miyon bari na 2018.

Y e tendencia ta cu e lo sigui subi te cu 100,23 miyon bari pa dia e aña aki, segun calculonan di e organisacion aki.

Mirando su importancia halto como materia primo, e benta di petroleo y su productonan ta forma un punto fundamental pa e politica exterior y comercial na nivel global.

Pa esaki, paisnan cu ta posee petroleo den su subsuelo tin un situacion privilegia, cu, sin embargo, no semper ta traduci den rikesanan grandi pa e caha di gobierno.

Paisnan cu reservanan mas grandi

Venezuela ta, sin duda, e pais cu e reservanan di petroleo mas grandi di mundo. E tin te cu 309 biyon di bari di petroleo, segun informacion statistico di e Central Inteligence Agency (CIA).

E di dos ta Arabia Saudita cu’n reserva di crudo di 266 biyon di bari y e di tres ta Canada cu’n abastecemento di 169 biyon di bari.

Solamente dos pais na America Latina ta aparece riba e lista: despues di Venezuela, cu ya caba a wordo nombra, ta sigui Brazil, cu’n produccion anual mucho mas chikito cu apenas 12 biyon di bari.

Esaki ta e principal paisnan cu e reservanan di petroleo mas grandi na nivel mundial.

Gasto di produccion

Pero e hecho di tin e oro preto no semper ta sinonimo di rikesa.

Un di e ehempelnan mas claro ta e mesun Venezuela, cu ta ocupa e prome luga di paisnan cu e reserva di petroleo mas grandi, pero e ta sumi den un crisis economico cu a pone cu te hasta mas di 3 miyon Venezolano, segun datonan di Nacionnan Uni, a bandona nan pais.

E motibonan di e caso Venezolano ta varios y diferente, pero a pesar di cu naturalesa a dun’e recursonan importante, e reservanan di crudo ta apenas un factor cu ta influi den e si e explotacion berdaderamente ta rendabel. No semper un pais cu reservanan grandi por saca y bende tur e petroleo cu e por.

Den e caso di Venezuela, e geologia no a pone facil pe. E gran parti di su petroleo ta pisa (of di pozonan petrolifero) cual ta haci’e mas dificil y mas costoso pa extra esaki, ya cu e mester di disolvente pa por pone esaki circula.

Ademas, despues di e sancionnan economico di Merca, Venezuela ya no por comercialisa su crudo dje facil ey y su red di cumpradonan a baha considerablemente.

Canada ta otro ehempel di un pais cu reservanan importante di posnan petrolifero, pero su costo di extraccion ta hopi halto ya cu crudo pa gran parti tambe ta pisa.

Otro paisnan tin otro tipo di restriccionnan na momento di produci petroleo: tasanan di belasting halto, manera ta e caso manera Brazil y Merca.

Tur esaki ta haci cu e gastonan di produccion ta subi y extrae e crudo na Brazil ta costa casi cuater biaha mas cu na Arabia Saudita, por ehempel, unda cu e gran parti di su petroleo ta likido y mas facil di comercialisa.

E gasto di produci un bari di crudo den e reino Saudita ta menos di 9 dollar, segun datonan di OPEP. Na Venezuela y Brazil, segun e mesun fuente, e ta costa 27,62 y 34,99 dollar respectivamente.

 

Comments

comments