‘No tur hende ta realisa cu Aruba ta den un crisis pasobra nan no a bay mucho atras den entrada’

Siman pasa tabata tin un cumbre virtual entre gobierno y tur lider di sindicato di Aruba, di sector publico, semi publico y priva, y tambe cu mediador di gobierno. E iniciativa a bini di mediador pa por fabor pone poco mas atencion den splica sindicatonan e situacion financiero di pais Aruba y con dificil e ta pasobra na pia di trabao ta nota cu no tur hende ta na altura di e seriedad y gravedad di e situacion.

“Hasta tabata tin bisa cu no ta tur hende ta realisa cu Aruba ta den un crisis pasobra nan no a bay atras mucho den entrada,” prome minister Evelyn Wever-Croes a expresa. Dus a invita tur lider sindical na un manera virtual cu e intencion pa comparti informacion di e situacion actual na consecuencia di covid, situacion financiero, y tambe palabracionnan cu Hulanda.

“Mi a cuminsa e encuentro expresando cu si bo pone bon atencion bo ta sinti un tension of presion den comunidad y hasta bo ta sinti manera cu sindicato cu gobierno tin problema contra otro, pero na mi parecer esey no ta e caso, gobierno y sindicato tin problema cu e situacion general cu Aruba ta aden,” segun prome minister.

Tabata hopi importante pa splica sindicatonan cu nan no ta para contra sindicato, defacto ta cu Covid a dal Aruba duro y e unico manera pa e isla Sali afo ta buscando ayudo. Anto e unico ayudo ta esun di Hulanda, cual a bin cu condicionnan. Sindicatonan a trece pa dilanti cu un di e condicionnan tabata corto den salario di sector publico y semi publico, esaki tabata un condicion generico pa Aruba Corsou y St Maarten, e sindicatonan a trece e critica pa dilanti dicon e exigencia aki a wordo aplica solamente na Aruba, pero gobierno di Aruba tampoco sa dicon anto a manda puntra Hulanda dicon e discriminacion aki pero no ta hayando un contesta satisfactorio.

“Mi sa cu Aruba nos ta tuma e situacion hopi na serio y ora Hulanda a pone e condicionnan aki nos a dicidi di cumpli, nos mester cumpli pa nos por haya financiamento pasobra nos tin un meta, cual ta pa para riba nos propio pia pa bay pa dilanti, y pa esey nos mester ayudo.”

‘Ban sigui duna contribucion boluntariamente pa yuda esnan mas vunerabel’
Na final di encuentro e mandatario a haci un apelacion na tur sindicato y empleadonan di WEB cu ta bayendo corte pronto contra cortamento di salario di 12.6%, “mi a splica nan cu si nos no a accepta e condicionnan aki, Aruba lo a kibra,” e mandatario a expresa. “Mi no ta kere cu esey ta algo cu nos kier, un Aruba kibra kiermen criminalidad y pobresa cu lo bati na porta di tur.”

Esaki ta un esfuerso conhunto y ta rekeri di nos tur pa sigui hala faha mara te ora por para riba nos propio pia. Den e caso di WEB, sindicato a trece pa dilanti cu nan a sinti nan mes forsa pa bay corte pasobra e cortamento di salario a wordo imponi riba nan pa 2021, mientras anja pasa esaki tabata boluntariamente.

 

Comments

comments