Despues cu Aruba a conoce un temporada di secura, e damnan a ser drecha. Pero ta keda haci un apelacion na pueblo pa no tira sushi den nan, pasobra e awa ta importante pa nos agricultura y tambe awa pa bestia, segun Nathaly Maduro directora di Santa Rosa.
A haci un limpiesa profundo den e damnan. Esey ta nifica cu e secura tabata tin toch su parti positivo pa Santa Rosa, pa loke ta e parti di damnan. Tabata lamentabel pa wak cuanto auto, motor, bateria di auto, cu a wordo haya den fondo di e damnan. Awor aki e damnan ta wordo controla regularmente. Tin contacto tambe cu departamento di Despa, esta salubridad, caminda cu a indica na nan cua ta e damnan cu ta wordo uza, pa tuma muestra di awa pa nan por controla nan.
Maduro a splica cu ta jammer, pasobra nan a wordo informa cu tin damnan cu ainda nan ta wak slangnan di cas cu ta manda nan awa septico den e damnan. Pa por menciona uno, a compronde cu e dam di Modansa cu un di e drivernan a haya un slang cu ta core for di un septic tank pa e dam y e cosnan aki ta hopi jammer. Pasobra tur ora, ora cu papia di dam, ta splica con importante e ta, pa tin e awa aki limpi constantemente. Ta un awa cu ta wordo uza pa cunukeronan. Nan ta uze no solamente pa irigacion di mata, pero tambe pa nan bestianan por bebe. Na momento cu e awa ta contamina, hendenan no ta realisa e peliger cu e ta trece pa comunidad. E contaminacion di e-coli por causa morto. Pa e motibo ey, cu Maduro ta haci un apelacion di curason, un biaha mas na tur esnan cu awor aki ta haci uzo di e dam pa manda nan awa septico of tambe e trucknan septico cu ta coy awa na dam y ta hiba awa pa hiba na plantacionnan, tin cu tene cuenta cu e slang, na momento cu e bay den un septic tank, e ta contamina cu cierto bacterianan. Na momento cu e mesun slang ey wordo poni den e awa di dam, ta haya cu e bacterianan ta traha hopi lihe. Tin varios dam awor aki cu ta yen cu awa bek. Pa e cunukeronan, ta un alivio pasobra a pasa door di un temporada cu no por a yudanan cu awa. Ta haci apelacion pa no tira sushi den e rooinan. Nos tin un dump. Ta conseha tambe hopi biaha, wak den bo sushinan, kico bo por recicla. Si bo ta un hende cu ta planta mata y bo ta uza bleki, boternan di refresco, tur eseynan ta articulonan cu bo por corta y traha bek den pochi cu bo por replanta, segun Nathaly Maduro.