Awo si lo no bay tin mas extension pa paga di e di dos mita di belasting pa number di auto. E fecha inicial di 30 di juni, 2021, a wordo cambia pa 2 di augustus. Pa e fecha aki tur belasting di auto mester ta completamente paga. Esaki Mervely Romano, relacionista publico di Departamento di Impuesto (DIMP) ta informa den un declaracion.
Ta recorda tur persona cu tin un vehiculo di motor, pa tene cuenta cu e fecha di 2 di augustus, pasobra a duna extension di un luna caba y awo no ta bay tin mas extension. “Clientenan a haya basta espacio pa por cumpli.”
Tin hopi cliente cu a haci uzo di e sistema di fase (pago parcial) y asina a logra caba di paga nan impuestonan di vehiculo di motor pa henter aña.
E ta recorda cu cualkier persona cu yega na caha dia 3 di augustus awo, e lo mester paga e di dos mita, mas 50% di boet di e saldo habri, pasobra e ta laat caba. Esaki ta algo cu por evita, mirando e diferente chens y pagonan parcial cu a ofrece na e pueblo.
Polisnan por cuminsa controla y impone un pv riba e automobilista cu no a cumpli. Pues dobel gasto extra.
