‘No tin indicacion ainda cu sector di construccion lo cuminsa cana mas agresivo den proximo tempo’

Den combersacion cu Mediador di Gobierno, Anselmo Pontilius, e ta comparti cu Masnoticia cu pa locual ta e parti di construccion, si por logra haya proyectonan cu ta cuminsa, por ehempel construccion di hotelnan nobo cu ta pendiente y e posibilidad den refineria, lo ta algo hopi positivo pa yuda den e situacion laboral. “Pa wak si realmente tin posibilidad cu den e proximo seis lunanan aki trabaonan por habri, pasobra si trabaonan por habri cu por ehempel proyectonan di un of dos hotel cu ta pendiente pa start, lo yuda sigur cu cantidad di trahadornan cu na momento aki ta sin trabao.”

Sr. Pontilius ta bisa cu ta asina si cu no necesariamente kisas tur lo ta cualifica pa traha den sector construccion, pero si trabaonan habri, lo bo por duna trabao na hendenan cu na momentonan aki ta depende solamente di 950 florin di e proyecto FASE.  Si esey ta e caso lo ta un alivio, pero segun e mediador, no tin un indicacion cu e sector di construccion ta cuminsa agresivo den e proximo lunanan nos dilanti.

Ta hopi bon pa tur departamento, compania of organisacion sa cua ta e proyectonan cu berdad ta ranca sali y cu por crea cuponan di trabao.

Comments

comments