Diahuebs mainta durante un conferencia di prensa, minister di Finanzas, Economia y Cultura, Sra. mr. Xiomara Ruiz – Maduro a elabora encuanto e reforma fiscal.
E mandatario a enfatiza cu e reforma fiscal ta un trabao basta grandi. E metanan ta ambicioso y a cuminsa esaki hunto cu Minister Presidente, unda cu ta sinta tur diahuebs cu Departamento di Impuesto, hunto cu CBS y Departamento di Legislacion, desde juni di e aña aki. Desde september ta sinta hunto cu Departamento di Aduana. Minister Presidente a sinta hunto cu Camara di Comercio y e Asociación di Belastingadviseurs, cu a duna nan punto di bista ariba e reforma fiscal.
E minister a indica cu ainda no tin decisionnan concreto tuma pa loke ta e reforma fiscal, pero si a duna un indicacion di kico tur lo por spera desde 1 di januari 2019 y kico lo pasa na 2020. Den henter e discusion e meta tabata ta cu pa dia 1 di januari, Aruba lo por ta asina leu cui e lo a conoce un reforma fiscal. Pero e realidad ta otro. Manera el a indica caba, e ta un trabao basta grandi. Ta trata aki, di bay di belasting directo pa belasting indirecto.
Awor aki locual cu tin riba mesa, si por mira bon, ta locual ta bira e ora e BBO of sino e OB y e BTW. E decision e ora lo mester ta pa un BTW cu lo ta simpel. Decision no a wordo tuma ainda. Minister Ruiz-Maduro a indica na prensa durante e conferencia, a mustra tur esaki pa por tin un idea pa loke ta bay bira belastingnan indirecto den e pais.
Conclusion ta cu, e cambio di mas grandi pa loke ta e reforma fiscal di bay di impuesto directo pa indirecto lo tuma luga 1 di januari 2020. E mandatario a sigura cu aki dos siman gobierno lo anuncia un serie di decision mas chikito tuma cu por drenta na vigor pa 1 di januari 2019. Ta premira cu pa prome cuartal di aña 2019, lo anuncia algo mas concreto y grandi cu por yuda mitiga e impacto di e actual crisis heffing mitar di 2019.