Ayera a tuma luga den corte di prome instancia, e caso di prome minister su yiu caminda sr. Jan De Ruijter hunto cu sr. Michael Williams a bin hunto manera ‘Stichting Nos Aruba’ en contra di prome minister su yiu homber, kende segun e stichting tabata negocia riba prijs di tereno pa asina cultiva marihuana na Aruba.
Abogado Ruiz di sr. Wever(prome minister su yiu homber) a bin dilanti pa asina comparti riba e caso aki. Despues di a duna un splicacion riba kico a tuma luga den corte e ta bisa cu e stichting a bin dilanti cu ‘tapes’ anto esey tabata e prueba pa culpa sr. Wever di corupcion y fraude.
Sinembargo segun sr. Ruiz, e stem no tabata di sr. Wever, cu su mama mes a reconoce, a bin na cla cu tabata stem di ‘un tal Arthur’. Ora a play tur 4 tapes, hues a puntra si esey tabata e unico prueba cu tin en contra sr. Wever, caminda el a contesta cu e tin mas ‘pero no por mustra awo pa motibo cu por stroba caso di ministerio publico.
Hues tabata kier suficiente evidencia, pero no tabatin nada pa bin en contra sr. Wever, asina abogado ta splica. Ora cu e menciona e sr. Arthur su stem. “A resulta di ta un Arthur Mansur, nos mirando e forma con sr. Williams ta papia cu odio, ta manera cu e door cu e mes no a haya su corupcion, e ta bin dilanti cu rabia asina”, e ta splica.
Sr. Ruiz tambe a duna un resumen di locual a tuma luga den corte pa bisa cu no na final no tabatin suficiente prueba. Na momento a cuminsa involucra otro hende y bufete di sr. Ruiz mes den e caso pero hues a bisa cu e caso tabata di sr. Wever y unda e prueba nan ta? Tambe sr. Ruiz a bay duna keho na ministerio publico mirando cu a ricibi menasa di sr. Williams.
Sr. Ruiz a bisa cu lo investiga si di berdad Stichting Nos Aruba ta uno existente, mirando no ta asina, hues lo condena pa gastonan di abogado. “Ta Sali na cla cu no ta stem di sr. Wever, pero nos lo tin cu warda e sentencia dia 29 di December wak kico hues ta dicidi. Nos lo keda warda”, abogado Ruiz a bisa.