Diamars a tuma e decision di blokia entrada na waf di Barcadera, pa motibo cu nan tin basta tempo ta luchando cu e situacion di huma ariba waf. Sr. Kenneth Geerman, director di GP Cargo ta splica.
Motibo di e accion aki ta door cu nan tin basta tempo cu ta luchando cu e situacion ariba waf akinan. Siman pasa nan tabata tin un reunion cu gerencia di ASTEC, y nan tin tur comprension con e cosnan aki ta bayendo. Pa pueblo por sa cu for di aña 2016, nan tabata tin poco molester di e huma. Despues el a cuminsa bira constant y den e ultimo lunanan e ta birando algo di casi tur dia. Siman pasa e tabata tin problema y diamars atrobe, cu ta strobanan di opera normalmente.
Nos ta solidario cu trahadonan di ASTEC. Nan tambe ta cana den huma, e ta dificil pa traha den un situacion asina. E ta malo pa salud di hende. nan a pone un protest pa yama atencion di gobierno, pa cu WEB. Gobierno ta doño di WEB y nan mester busca un solucion. Nan a sinta cu ASTEC , cu a mustranan tur carta ariba mesa. GP Cargo ta solidario cu ASTEC, y nan no ta den conflicto niun momento. Nan ta traha como ruman banda di otro. Pero esaki no pro sigui asina.
ASTEC a laga companianan di afo haci un sondeo di aire ariba waf cu ta malo pa salud di hende. Tur hende sa cu e heavy fuel oil cu WEB ta kimando, e no ta light den sulfur. Aki na Aruba nan ta uza un fuel oil barata cu ta haciendo daño na comunidad, na trahadonan di GP Cargo y trahadonan di ASTEC. Loke por a compronde cu e ASTEC ta den deliberacion cu Natuur & Milieu y cu nan ta trahando ariba dje. Pero simplemente, dia pa dia esaki ta birando di mas. Enbes di un break di un biaha pa luna, el a bira di un bes pa siman, pa awo ta casi tur dia.
Segun Sr. Geerman, e companianan di carga ta weso di lomba di economia di Aruba. Si no saca container, economia di Aruba no ta draai, supermercadonan ta keda bashi. Nan kier atencion di gobierno mas pronto posibel pa laga WEB busca un solucion a largo plaso. Cuminsa cumpra fuel oil di miho calidad y stop di susha medio ambiente. Ni e trahadonan di GP Cargo y ni di ASTEC no por sigui traha asina.
Pa loke ta e containernan, liña di barco, ta duna containernan cierto dianan liber pa sak’e y hib’e waf bek. Tin ora semper algo por pasa cu containernan ta keda extra dia, cliente tin cu pag’e, comercio tin cu pag’e. Pero loke nan ta stress ariba dje awo, ta container frieu. Barco ta bin cu container frieu for di Merca y nan no por baha niun container awe. Esaki lo tin su consecuencianan pa comercio di Aruba.
ASTEC su trahadonan tampoco ta trahado ariba e tereno. nan ta sinta den nan staf local. Cada rato e supervisor ta bay check ariba e barco, of den cercania. Si nan por traha, paso tin ora e trahandonan ta traha asina mes den e huma, cual nan ta aprecia. Pero tin ora esaki ta demasiado y nan ta bay tuma nan break.
Por ultimo, Sr. Geerman a splica cu nan a papia cu e hefe di e departamento di siguridad cu nan tambe kier un tiki atencion pa e situacion. El a reuni cu gerencia di kico ta e motibo di e accion. E trucknan ta para for di 6 or di mainta na waf, pero e barconan no ta trahando. GP Cargo no ta haciendo niun daño na economia, ya cu ta e barconan no ta trahando pa saca container.