Directiva di Centro di Bario Playa Pabao ta anuncia cu e aña aki un biaha mas ta organisa nan famoso y tan spera “Plan Vacacional” di luna di October. E actividad ta tuma luga cu un duracion di un siman, cuminsando 2 di October y terminando 6 di October. E programa ta di dialuna pa diabierna di 8’or am pa 1’or pm. Nos Plan Vacacional ta specificamente pa muchanan entre 4 y 15 aña. Ariba peticion di e muchanan a dicidi pa hisa e edad pa 15 aña. E aña aki e tema ta “Ban Haci Deporte”. Durante e siman aki ta bay tin actividad cu lo tuma luga na Centro mes y tambe lo bishita diferente luga manera lo bay lama, deporte, obra di man y hopi actividad mas. E actividadnan ta basa riba e tema di “Ban Haci Deporte” y ta bay tin weganan recreativo pa tur mucha tanto paden como pafo. Manera tur aña e ultimo dia di e Plan Vacacional lo tin un anochi di presentacion pa mayornan por gosa di show cu cada grupo ta presenta. Naturalmente por bin cambio ainda den e programa.
Mayornan por pasa inscribi nan yiu (nan) na Centro di Bario Playa Pabao di dialuna pa diabierna, mainta entre 8’or am y 12’or pm y atardi entre 2’or pm y 6’or pm. Nos Plan Vacacional tin un duracion di un siman y ta cobra e suma di 50 florin pa mucha y cu ta inclui tur actividad cu ta tuma luga y tambe cada mucha ta haya un sandwich cu juice mainta. Pa motibo organisatorio e ultimo dia pa inscribi ta diasabra mainta dia 30 di September te cu merdia 12’or. Directiva di Centro di Bario Playa Pabao ta recorda mayornan pa inscribi nan yiu (nan) na tempo pa asina evita cu e mucha ta bay riba lista di espera. Directiva di Centro di Bario Playa Pabao ta desea nos muchanan di Playa Pabao y di Aruba en general un dushi vakantie. Pa mas informacion por pasa libremente durante orario di inscripcion of yama Centro di Bario Playa Pabao telefon 583-7775 entre 3’or pm y 6’or pm.