Diamars mainta, miembronan di sindicato SADA mal contento a dicidi di pone trabao abao, pa cual a puntra Minister di Finanzas, mr. Xiomara Maduro, ya cu sindicato SADA a bisa di cu nan no ta hayando oido di parti di e mandatario pa nan preocupacionnan.
Segun e mandatario, parti di e pensamento di e sindicato tabata pa pone waf plat pa nan haya atencion pa nan problemanan. Na februari nan a sinta na mesa cu e sindicato unda cu esaki a bin cu’n lista di 20 punto y a bisanan pa saca e prioridadnan, cual a wordo trata. Y e otronan a pidinan un tempo pa asina e mandatario por a caba di traha ariba presupuesto di 2018. Banda di esey, e mandatario sigui bisa, cu no ta solamente presupuesto 2018. Pero tambe nan tabata bezig cu Cft tambe y tambe cu negociacionnan cu Hulanda, cu tin cu tuma luga. Dus tur ta tumando luga na mes momento. A informa SADA cu pasobra e no a sinta reuni cu nan, esey kiermen cu e preocupacionnan cu nan a trece dilanti no ta wordo trata. Pa ta specifico, a bay ariba puntonan e.o. e salario. Esaki no tabata presupuesta pa Bermudez, y mr. Maduro a percura pa pone esaki den presupuesto, pa e bira posibel. Ultimo biaha a splicanan cu Departamento di Recurso Humano ta trahando ariba dje.
Pero na e momentonan aki, DHR, hustamente pa e negociacionnan cu Hulanda, tabata trahando tambe ariba locual ta e plan di personal. Loke e mandatario kier ilustra, ta cu no solamente e Minister di Finanza, Economia y Cultura di e pais aki su agenda ta yen, pero tambe e departamentonan concerni cu tin cu produci e producto cu Douane (SADA) kier mira. Esakinan tambe tin un agenda cu nan tin cu cumpli cun’e cu cierto prioridadnan, y no solamente pa un departamento importante di pais Aruba, pero pa pais Aruba completo. Y esey ta e prioridad cu tin e ora cu ta bay prome cu SADA. Ta p’esey e mandatario ta lamenta cu un dia prome el a yama Sr. Maduro, el a manda un mensahe pa Sr. Maduro pa e bin pa un reunion cu e mandatario, cu DRH y Directie Wetgeving pa 8 or di anochi. Pero Sr. Maduro tabata inalcansabel, como tambe Sr. Vrolijk pa pidinan pa sinta. Pero nan no kier sinta mas cu e minister ya cu den SADA su opinion, e minister ta arogante.
No ta cuestion di arogancia, pero tabata tin un cierto free for all, cu ora cu no gusta loke e director bisa ta bay cerca e minister. E ora e minister ta overrule e director pa nan haya nan kier. E tipo di cosnan aki no ta bon. Locual cu Sr. Maduro tambe ta haci, ki hustificacion tin pa pone douane plat, ariba cosnan cu tin di haber cu operacional. Cosnan cu tin cu resolve na Douane mes. Ta cosnan cu mas importancia, cosnan di salario. A traha diligentemente pa pone placa. Pero e minister anterior niun rato a pone placa pa nan pa e ora e cosnan aki por a bira posibel. Ta hustamente e minister cu no tin respet pa sinta cu nan y ta arogante, ta hustamente e mesun minister aki ta esun cu a percura pa tur e cosnan aki ta na nan luga.
Gobernacion di e pais aki, na e momentonan aki, ta dificil. Ora cos ta facil, tur hende por goberna, pero ora cos ta dificil, e ora por mira ken tin e labada y ken no. Den e caso aki, di verdad y esey a wordo bisa tambe, cual ta un mensahe el a manda pa Sr. Maduro, cual el a quote. Minister di Finanzas a pidi tambe respet si pa su funcion como mandatario encarga cu tres cartera pisa y gobernando na un momento dificil. E sa di e preocupacion cu SADA tin. Su conseheronan sa kico ta pasando. E dolor di mas grandi di SADA tabata e cuestion di salario. El a trata cun’e, el a pone placa pe. Nan a sinta cu Directie Wetgeving, DRH y e asunto ta wordo atende cun’e. Kico mas nan kier? Na opinion di e mandatario, esaki ta parce algo di mala fe. Asina cu e mira cu e sfeer di Armagadeon rond di 1 di juli, e ta mira atrobe cu tin hende cu ta cuminsa presta nan mes, pa agenda politico. E no por sigura cu ta esaki. Pero e ta bisa pa laga politiek, pa politiconan. Laga e profesionalnan haci nan trabao. Ta respeta tur hende como profesionalnan den nan trabao, e mandatario a finalisa bisando.